आज मात्रै ८२ जनामा कोरोना सङ्क्रमण पुष्टि

२८ असार ०७७, काठमाडौं । पछिल्लो २४ घण्टामा थप ८२ कोभिड–१९ सङ्क्रमित थपिएका छन् । स्वास्थ्य तथा जनसङ्ख्या मन्त्रालयका प्रवक्ता प्रा डा जागेश्वर गौतमले विभिन्न २५ प्रयोगशालामा गरिएका तीन हजार ९१६ नमूना परीक्षणमा ८२ जनामा सङ्क्रमण पुष्टि भएको जानकारी दिएका छन् । यससँगै कोरोना सङ्क्रमितको कूल सङ्ख्या १६ हजार ८ सय १ पुगेको छ ।
प्रदेशगतरुपमा आज कोरोना सङ्क्रमण पुष्टि भएकामध्ये प्रदेश नं १ मा चार, प्रदेश नं २ मा २०, वाग्मती प्रदेशमा १४, गण्डकी प्रदेशमा १५, प्रदेश नं ५ मा दुई, कर्णाली प्रदेशमा २१ र सुदूरपश्चिम प्रदेशमा छ जना रहेका छन् ।
मन्त्रालयद्वारा आयोजित नियमित पत्रकार सम्मेलनमा दिइएको जानकारीअनुसार देशभरका क्वारेन्टिनमा हाल २३ हजार ७ सय ८४ रहेका छन् । आइसोलेशनमा रहेका कोरोना सङ्क्रमितको सङ्ख्या आठ हजार १ सय ७४ रहेको छ । पछिल्लो २४ घण्टामा कोरोना सङ्क्रमणमुक्त भई घर फर्किनेको सङ्ख्या १ सय ४७ रहेको छ । योसँगै हालसम्म डिस्चार्ज हुनेको सङ्ख्या आठ हजार ५ सय ८९ रहेको छ । कूल कोरोना सङ्क्रमितमध्ये ५१ दशमलव एक प्रतिशत उपचारपछि घर फर्किएका मन्त्रालयले जनाएको छ । हालसम्म कोरोना सङ्क्रमणबाट मृत्यु हुनेको सङ्ख्या ३८ रहेको छ ।
प्रवक्ता गौतमले हालसम्मको तथ्याङ्कअनुसार विश्वभर एक करोड २८ लाख ६३ हजार ७ सय २४ कोरोना सङ्क्रमित भएका छन् । कोरोनाले पाँच लाख ६८ हजार ५२ को निधन भइसकेको छ ।

दक्षिण एशियाली क्षेत्रीय सहयोग सङ्गठन (सार्क) मुलुकमध्ये नेपाल पिसिआर परीक्षण गर्ने मुलुकमा अगाडि रहेको छ । भारत, बङ्गलादेश, श्रीलङ्का, पाकिस्तान र अफगानिस्तानभन्दा अगाडि रहेको छ । पत्रकार सम्मेलनमा इपिडिमियोलोजी तथा रोग नियन्त्रण महाशाखाका निर्देशक डा वासुदेव पाण्डेले नेपालमा हालसम्मका कोरोना सङ्क्रमितमध्ये शुन्य दशमलव तीन प्रतिशतमा मात्र केही लक्षण देखिएको बताए।
ती लक्ष्यणमध्ये ज्वरो आउने, खोकी लाग्ने मात्र छ, अन्य गम्भीर खाले बिरामी नभएको पाइएको बताए । हालसम्म मृत्यु भएकामध्ये ०.२१ प्रतिशत पर्छ । यीमध्ये २४ जनामा दीर्घ रोगीको समस्या रहेको देखिएको छ । खासगरी ५० वर्षभन्दामाथि उमेरका व्यक्तिको निधन भएको पनि डा पाण्डेले बताए ।