युएईका प्रधानमन्त्रीले लिए कोरोनाको खोप

१८ कात्तिक ०७७, अबुधाबी (रासस/एएनआई)युनाइटेड अरब इमिरेट्स (युएई)का प्रधानमन्त्री शेख मोहम्मद बिन रसिद अल मख्तुमले मंगलबार कोरोना विरुद्धको खोप लिएका छन् ।
प्रधानमन्त्री शेख मोहम्मदले स्वास्थ्यकर्मीबाट खोप लिँदै गरेको तस्वीर ट्वीटर मार्फत सार्वजनिक गरेका हुन् ।
उनले ट्वीटरमा युएईका प्रत्येक व्यक्तिको स्वास्थ्यलाई ध्यानमा राखेर कोरोना विरुद्धको खोप सबै नागरिकलाई उपलब्ध गराइने बताएका छन् ।
केही साताभित्रै युएईका कतिपय मन्त्रीहरुले पनि खोप लिइसकेका छन् ।
युएइले कोरोनाका बिरामीको परिस्थिति बिचार गरी आपतकालीन प्रयोगका रुपमा खोप दिन थालेको जनाएको छ ।
तर कुन देश वा कम्पनीको खोप लगाइएको हो भन्ने स्पष्ट गरिएको छैन ।