काठमाडौंको खुलामञ्चमा निःशुल्क खाना खुवाउन अवरोध नहुने

२२ कात्तिक ०७७, काठमाडौं । खुलामञ्चलगायत काठमाडौँका सार्वजनिकस्थलमा आगामी मङ्सिर २ गतेदेखि निःशुल्क खाना खुवाउने सहमति भएको छ । दाता र माहनगरबीच सहमतीपछि खाना खुवाउन अवरोध नहुने भएको हो । खुलामञ्चलगायत काठमाडौँका सार्वजनिकस्थलमा आगामी मङ्सिर २ गतेदेखि निःशुल्क खाना खुवाउने सहमति भएको छ । खुला स्थानबाट सञ्चालन हुँदै आएको निःशुल्क खाना व्यवस्थापन गर्ने विषयमा कामपा र निःशुल्क भोजन व्यवस्थापन गराउँदै आएका दाताबीचको छलफलपछि सहमति भएको हो ।
कामपाका प्रमुख विद्यासुन्दर शाक्यले मानिसलाई एकै ठाउँमा भेला गर्नुभन्दा आवश्यक भएका ठाउँमा सानो समूहमा भोजनको व्यवस्था गर्नुपर्ने बताए । प्रमुख शाक्यले बन्दाबन्दीका समयमा महानगरले एक लाख ५० हजार परिवारलाई राहतस्वरुप राशन वितरण र दुई लाख ५० हजार व्यक्तिलाई निःशुल्क भोजन गराएको पनि स्मरण गरे ।
“दाताहरुले खाना खुवाएकामा हाम्रो विरोध होइन, खाना खानेहरुको स्वास्थ्य सुरक्षासम्बन्धी चासो भने अवश्य हो, खुला मञ्चको साटो पार्टी प्यालेसतिर व्यवस्था गरौंँ । यसका लागि आवश्यक पर्ने थप खर्च कामपा पनि व्यहोर्न तयार छ”, प्रमुख शाक्यले भने ।
छलफलमा निःशुल्क भोजनको व्यवस्थापन गर्दै आएका हाम्रो टिम नेपाल, मानवी क्रियशन एशोसिएशन, लायन्स क्लब अफ काठमाडौँ, न्यु ग्रीन सिटी, सेफ्स एशोसिएशन अफ नेपाल, हाम्रो सानो प्रयासलगायत सङ्घसंस्थाका प्रतिनिधि सहभागी थिए ।