पुस ५ गते साढे ३ बजे नै अविश्वास प्रस्ताव दर्ताः संसद सचिवालय

८ पुस ०७७, काठमाडौं । संघीय संसद सचिवालयले प्रधानमन्त्री केपी शर्मा ओलीविरुद्ध पुस ५ गते ३ बजेर ३० मिनेट जाँदा अविश्वास प्रस्ताव दर्ता भएको जनाएको छ ।
सचिवालयले दर्ता समयलाई लिएर विभिन्न सञ्चार माध्यममा आएका समाचारका विषयमा एक विज्ञप्तिमार्फत ध्यानाकर्षण समेत जनाएको छ।
प्रवक्ता डा.रोजनाथ पाण्डेद्वारा जारी विज्ञप्तिमा भनिएको छ, ‘अविश्वास प्रस्ताव प्रतिनिधि सभाका सम्माननीय सभामुखज्यू समक्ष पेश गरी कार्यव्यवस्था शाखा (प्रतिनिधि सभा) मा दर्ता हुने प्रचलन रहेको र २०७७ पौष ५ गतेका दिन पनि सम्माननीय सभामुखज्यूलाई सम्बोधन गरी विधिवत् रुपमा पेश भई सम्माननीय सभामुखज्यूको तोक आदेश भएपछि सोही दिन अपराह्न ३ः३० बजे कार्यव्यवस्था शाखा (प्रतिनिधि सभा) मा दर्ता भएको व्यहोरा जानकारी गराइन्छ ।’