७ फागुन ०७८, काठमाडौं । आईसीसी टी–ट्वान्टी विश्वकपको ग्लोबल छनोटमा नेपालले लगातार दोस्रो जित निकालेको छ ।
ओमानको अल अमेरात क्रिकेट मैदानमा शनिबार भएको खेलमा नेपालले फिलिपिन्सलाई १ सय ३६ रनले पराजित गरेको हो ।
जितसँगै समूह एमा रहेको नेपाल सेमिफाइनल नजिक पुगेको छ । दुई खेलबाट चार अंक जोडेको समूहको शीर्ष स्थानमा समेत उक्लिएको छ ।
२ सय १९ रनको लक्ष्य पछ्याएको फिलिपिन्सले निर्धारित २० ओभरमा ८ विकेट गुमाउदै मात्र ८२ रनमा समेटियो ।
फिलिपिन्सका लागि जोर्डन अलेग्राले २७, ड्यानियल स्मीथले २०, कप्तान जोनाथन हिलले ११ र कपिल कुमारले ४ रन जोडे ।
नेपालका कप्तान सन्दीप लामिछानेले सर्वाधिक ३, गुल्सन झा, दिपेन्द्र सिंह ऐरी, कुशल मल्ल, अविनाश बोहरा र जितेन्द्र मुखियाले एक–एक विकेट लिए ।
यसअघि पहिले टस हारेर ब्याटिङ गरेको नेपालले निर्धारित २० ओभरमा ३ विकेट गुमाउँदै २ सय १८ रन बनाएको थियो । नेपालका लागि कुशल भुर्तेलले शतक प्रहार गरे । कुशलको टी–ट्वान्टी क्रिकेटमा यो पहिलो शतक हो । उनले ६१ बलमा १३ चौका र एक छक्का हान्दै अविजित १ सय ४ रन बनाए ।
दिपेन्द्र सिंह ऐरीले ८३ रन जोडे । उनले ४७ बलमा ६ चौका र ४ छक्का हिर्काए । कुशल र दिपेन्द्रले नेपालका लागि टी–ट्वान्टीमा सर्वाधिक १ सय ७१ रनको साझेदारी समेत गरे ।
कुशल मल्लले १२, लोकेश बमले अविजित ६ रन बनाए । फिलिपिन्सका लागि गुर्धुपिन्दर चोहान, मिग्गी पोडोस्की र ड्यानियल स्मीथले एक–एक विकेट लिए ।
नेपालले तेस्रो खेल आगामी सोमबार क्यानाडासँग खेल्ने तालिका रहेको छ । समूह चरणको खेलपछि शीर्ष दुई टोली दुबै समूहबाट सेमिफाइनलमा प्रवेश गर्नेछन् ।
प्रतिक्रिया