ललितपुरमा महिला उद्यमी मेला हुँदै, उद्यमशीलतालाई प्रवद्र्न गर्ने लक्ष्य

२५ फागुन ०७८, ललितपुर ।  ललितपुरमा महिला उद्यमी मेला हुने भएको छ ।‘महिला सशक्तीकरणको आधार,उद्यमशीलता र रोजगार’ भन्ने मूल नाराका साथ १ सय १२ औँ अन्तराष्ट्रिय नारी दिवसको अवसरमा ललितपुरको पाटनस्थित नागवाहाल र इलाननीमा मेला आयोजना हुने भएको छ । ललितपुर महानगरपालिका वडा नं १६ को आयोजनामा यही फागुन २७ बाट सुरु हुने मेला २९ गतेसम्म चल्नेछ ।

शुक्रबार दिउँसो १ बजे बाग्मती प्रदेश सरकारका संस्कृति तथा पर्यटनमन्त्री दिपेन्द्र श्रेष्ठले उद्यमी महिला मेलाको उद्घाटन गर्नेछन् । मेलाको विषयमा जानकारी दिन बुधबार आयोजित पत्रकार सम्मेलनमा ललितपुर महानगरपालिका १६ का वडाध्यक्ष निर्मलरत्न शाक्यले महिला सशक्तीकरणको आधार,उद्यमशीलता र रोजगार भन्ने मूल नाराका साथ महिला उद्यमशीलतालाई प्रवर्धन गर्ने, विविध क्षेत्रमा क्रियाशील स्थानीय प्रतिभालाई पहिचान गर्दै थप प्रतिभा प्रष्फुटन गराउने र संस्कृति उत्थान गर्ने उद्देश्यले मेलाको आयोजना गरिएको जानकारी दिए ।
मेलामा स्थानीय महिला समूह र विभिन्न सहकारीहरुले उत्पादन गरेका काष्ठकला,गरगहना,कपडा,धातुका मुर्तिहरु,दैनिक प्रयोगका सामग्रीहरु,खाद्य सामग्री,लत्ता कपडा र सज्जावटका सामग्रीहरु गरी नागवाहालमा ५१ वटा स्टल रहनेछन् ।
साथै हस्तकलाका सामग्रीको सहुलियत दरमा विक्री वितरण गर्ने स्टलहरु पनि रहनेछन् । हरेक दिन बिहान १० बजेदेखि बेलुकी ७स्३० सम्म मेला चल्ने आयोजकले बताएको छ ।
मेलामा नेपाल हस्तकला महासंघद्वारा हस्तकला,प्याभीलोन,ललितपुर उद्योग वाणिज्य संघले ललितपुर जिल्लामा उत्पादित सामग्रीको प्रवर्धन गर्न अघि सारेको मेड इन ललितपुरको अवधारणा अनुरुप मेड इन ललितपुर प्याभिलोन रहनेछ । यस्तैगरी मेलामा हस्तकलाजन्य सामग्री उत्पादनको जीवन्त प्रदर्शनी पनि देखाईनेछ ।

विश्वप्रसिद्ध हिरण्यवर्ण महाविहार्व परिसर इलाननीमा नेवास्खाजाका विभिन्न स्टलहरु रहनेछन् ।मेलाबाट नेवारी खाजाको ब्राण्डिङमा सहयोग पुर्याउने आयोजकको विश्वास रहेको छ । तीन दिने मेलाको हरेक दिन सांगीतिक क्षेत्र,ख्यातिप्राप्त कुटुम्ब ब्याण्ड र प्रोजेक्ट बाजाको विशेष सांगीतिक प्रस्तुति गरिनेछ ।

हस्तकला महासंघका उपाध्यक्ष रविन शाक्यले यस्तो मौलिक र महत्त्वपूर्ण मेलामा सहभागी हुन पाउनु महासंघका लागि गौरवको विषय भएको बताए । यद्यपि विश्वको पैँतिसौ हस्तकला नगरीको रुपमा पाटनलाई घोषणा गरिएको ३ वर्ष भईसक्दा पनि ललितपुर महानगरपालिका र राज्यका निकायले यसमा चासो नदिएको उनको गुनासो छ । नगरप्रमुख चिरीबाबु महर्जनले समेत मेला तथा स्थानीय संस्कृति प्रवर्धनमा उदासिन भएको उनले आरोप लगाए ।

हेर्नुहोस् विज्ञप्ति