चापागाँउमा कृषि पर्यटन तथा साँस्कृतिक मेला आयोजना हुँदै

ललितपुर खबर
१७ चैत्र ०७८, चापागाँउ । दक्षिण ललितपुरको सदरमुकामको रुपमा परिचित चापागाँउमा गोदावरी कृषि, पर्यटन साँस्कृतिक महोत्सव २०७८ आयोजना हुँदैछ । विहीबार चापागाँउको बज्रवाराहीमा आयोजित पत्रकार सम्मेलनमा दिइएको जानकारी अनुसार यही चैत्र २५ गतेदेखि वैशाख ४ गतेसम्म चापागाँउ टाहाखेलस्थित रंगशालामा मेला आयोजना हुँदैछ ।

कार्यक्रममा बोल्दै मेलाका आयोजक गोदावरी नगरपालिकाका मेयर गजेन्द्र महर्जनले स्थानीय कला, संस्कृतीको संरक्षणका लागि मेला आयोजना गर्न लागिएको बताए । उनले भने, ‘हामी पहिलोपल्ट यस्तो खाले मेला आयोजना गर्दैछौं । मेलाको उदेश्य स्थानीय कला, पर्यटन प्रवद्र्धन र कृषि क्षेत्रको उत्थानका लागि हो ।’

गोदावरी उद्योग वाणिज्य संघका अध्यक्ष जगन्नाथ महर्जनले महिला उद्यमीहरुका लागि निशुल्क स्टल दिइने बताए । उनले भने,‘मेलाले दक्षिण ललितपुरको प्रवद्र्धनको कोषेढुंगा सावित हुने विश्वास छ ।’ कार्यक्रममा वडा नं. १३ का वडाध्यक्ष भाष्कर थापाले मेलाले आफूहरुले नयाँ कुरा सिकाउने बताए ।

मेलामा प्रवेशका लागि ४० रुपैया शुल्क निधारण गरिएको छ भने बृद्धहरुलाई निःशुल्क प्रवेश गराइने बताए ।
कार्यक्रमको व्यवस्थापक रहेको सुरताल इभेन्टले सबै नाफा घाटा व्यहोर्ने गरि सम्झौता गरिएको मेयर महर्जनको भनाई छ । उनले भने,‘नगरपालिकाले ५ लाख दिनेछ । नाफा घाटा सबै इभेन्ट कम्पनीको हो ।’

कार्यक्रमको संयोजन राष्ट्रिय संगीतकर्मी संघले गरेको छ भने गोदावरी उद्योग बाणिज्य संघ सहआयोजक रहेको छ ।
मेलामा सास्कृतिक कार्यक्रम रहनेछ । टिकटक च्यालेन्ज,खुला नृत्य प्रतियोगिता, ललितपुर डान्स आइडल, समेत आयोजना हुने बताइएको छ ।

मेलामा लाखे नाच, खैजडी भजन,बाँसुरी,धिमेबाजा र झाँकी समेत देखाउने योजना रहेको कार्यक्रम संयोजक सुवास महतले बताए । कार्यक्रम स्थलबाट गोसाइकुण्ड यात्राका लागि हेलिकप्टरको समेत व्यवस्था हुनेछ ।
कार्यक्रम स्थलसम्म जानका लागि चापागाँउ बजारबाट अटो रिक्साको व्यवस्था हुनेछ ।