मुड्खु–तीनपिप्लेका स्थानीयद्वारा पुन: सडक अवरुद्ध, उपत्यकाको फोहोर व्यवस्थापनमा समस्या

१८ चैत्र ०७८, काठमाडौं । मुड्खु–तीनपिप्ले सडकका स्थानीयले सडक पुन: अवरुद्ध गरेका छन् । सम्झौता अनुसार सडक कालोपत्रे गर्न आलटाल गरेको भन्दै तिनपिप्लेमा भेला भएर स्थानीयले सवारी साधनमा रोक लगाएका हुन् ।

सम्झौता अनुसार ठेकदारले बाटो निर्माणमा अलमल गरेकाले बाध्य भएर पुनः बाटो अवरोध गर्नु परेको पासाङ ल्हामू राजमार्ग सुधार संघर्ष समितिका संयोजक भवनाथ गजुरेलले बताए ।  ‘चैत्र मसान्त सम्ममा पिच गर्ने सम्झौता भएता पनि ठेकदारले झुलाउने मात्रै काम गरेकाले  बाध्य भएर बाटो अवरोध गरेका हौ’  संयोजक गजुरेलले भने, ‘एक चरणको बेस ओछाउने  र रोलरिंगको काम सकिसकेको छ तर पिचको काम गर्नका लागि पटक पटक ताकेता गर्दा पनि आजको दिन सम्म कुनै तयारी नगरेकाले  बाटो अवरोध गरेका हौ ।’

मुड्खु–तीनपिप्ले खण्ड कालोपत्रेको माग राख्दै स्थानीयले रोक्दा काठमाडौंको फोहोर सङ्कलन समेत प्रभावित बन्ने देखिन्छ । स्थानीयको अवरोधका कारण उपत्यकाको फोहोर विसर्जस्थलसम्मको ढुवानी रोकिने देखिएको हो । मुड्खु– तिनपिप्ले सडक खण्ड अवरोध भएपछि सिसडोल ल्याण्डफिल साइटमा  जाने  फोहोरका टिपरहरूलाई स्थानीयले तिनपिप्लेबाटै फिर्ता पठाउने गरेका छन् ।