बढ्यो कोरोना संक्रमणदर, एकैदिन ९१५ जनामा कोरोना पुष्टि

१८ साउन ०७९, काठमाडौं ।पछिल्लो २४ घण्टामा थप ९१५ जनामा कोरोना संक्रमण पुष्टि भएको छ भने २ जनाको मृत्‍यु भएको छ । ६ हजार २ जनाको परीक्षणमा ९१५जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

मन्त्रालयका अनुसार यो अवधिमा ३०१ जना कोरोना संक्रमणमुक्त भएका छन् । यो संक्रमण संख्या चौथो लहर सुरु भएयता नेपालमा एकैदिन पुष्टि भएको सबैभन्दा धेरै हो । हाल संक्रमणदर १५ प्रतिशतभन्दा बढी रहेको पनि मन्त्रालयले जनाएको छ ।

पछिल्लो चौबिस घण्टामा काठमाडौं उपत्यकामा ४२२ जना कोभिड १९ संक्रमित थपिएका छन् । आज काठमाडौंमा ३३७, भक्तपुरमा ३२ र ललितपुरमा ५३ जना संक्रमित थपिएका हुन् ।आज देशभर रहेका पाँच हजार ४३३ जना सक्रिय संक्रमितमध्ये पाँच हजार २७५ जना होम आइसोलेसनमा र १५८ जना संस्थागत आइसोलेसन छन् । अस्पतालमा रहेकामध्ये ४३ जना आईसीयूमा र दुईजना भेन्टिलेटरमा रहेको स्वास्थ्य तथा जनसंख्या मन्त्रालयले जनाएको छ ।