लगनखेल साइकल लेनको पोल फ्याकियो,सडकभरि फोहोर, यात्रुलाई बाधा

२५ साउन ०७९, लगनखेल ।

ललितपुर लगनखेल सातदोवाटो सडकस्थित साइकल लेनमा राखिएकोे ब्यारिकेडेट पोल निर्माण गरेको १५ दिनमै झिकेर फ्याकिएको छ ।
महानगरले वडा नं. १५ लगनखेलको बटुक भैरवदेखि ६ सय मिटर अगाडि सातदोबटोसम्म राखिएको पोल अज्ञात व्यक्तिले झिकेर फ्याकेको हो ।
ढलान किलाले अड्काइएका प्लाष्टिकका ती पोल फुटपाथमा दर्जनभन्दा धेरै संख्यामा फ्याकिएको देख्न सकिन्छ । सातदोवाटोमा पसल सञ्चालन गरेर बसेकी एक व्यापारीका अनुसार राखेको एक हप्ता नपुग्दै आफूले फुटपाथमा पोलहरु झिकेर फ्याकेको अवस्थामा देखेको बताइन् । उनले भनिन्, ‘मैले त राखेको नमिलेर निकालेको भन्ने सोेचेको थिए । आजकल त धेरै वटा फ्किएको छ ।’

महानगरका प्रवक्ता राजु महर्जनले ब्यारिकेडेट पोल साइकल लेनमा कस्तो हुने रहेछ भनेर ट्रायलका लागि राखिएको बताए । उनले भने, ‘हामीले जनताको प्रतिकृयाका लागि यो राखेका हौं । राम्रो प्रतिकृया आए विस्तार गर्ने योजना छ ।’
उनका अनुसार यो प्रयोग एक नीजि कम्पनीले निशुल्क राखिदिएका हो । साइकल लेनमा त्यस कम्पनीसँग महानगरले सम्झौता गरेर किनेर अन्य ठाँउमा राख्नका लागि मौखिक सहमती भएको बुझिएको छ ।
महानगरकै एक वडाध्यक्षले नाम नबताउने शर्तमा सडकमा साइकल लेनमा पोल राखेर अरु सवारीसाधनलाई बाधा पुगेको बताए । उनले आलोचना गर्दै भने, ‘महानगरले सक्कने भए फराकिला सडकमा साइकल लेन बनाउनु नि । सधै भीड हुने साधुरा सडकमा साइकल लेन बनाउदा सबैलाई बाधा परेको छ ।’
साइकल लेनमा राखिएका यस्ता पोलका कारण साइकलयात्रीलाई सहज बनाउने भन्दै महानगरले राखेको पोलभित्र अझैं काटेर फ्याकिएको रुखका हागा,माटो, ढुंगालगायतका सामान असरल्ल फ्याकिएको छ । लामो समयसम्म साइकल गुड्न नदिई निर्माण सामाग्री फ्याक्दा फुटपाथका यात्रु समत सडकबाटै हिड्नु पर्ने बाध्यता छ । एक यात्रुले आक्रोस पोख्दै भने, ‘महानगरले यो सबै नाटक गरेको हो । जनतालाई दुःख दिन नीजि कम्पनीको सामान विकाउने खेल हो ।’
महानगरले साधुँरो सडकमा साइकल लेन बनाउदा यसको नकारात्मक प्रभाव परेको यात्रुहरु बताउदै आएका छन् । जनताले तिरेको लाखौ कर खर्च गरेर साइकल लेन भन्दै सडकमा रंग पोत्न छोडेर महानगरले दिगो र भरपर्दो संरचनामा खर्च गर्नु पर्ने महानगरबासीले माग छ ।