ललितपुर महानगरले सुन्दरीघाटलाई बनायो अस्थायी डम्पिङ्ग साइट, स्थानीयद्वारा विरोध

ललितपुर खबर
५ भदौं ०७९, ललितपुर । ललितपुर महानगरले सानेपा,धोविघाट नजिकै रहेको सुन्दरीघाटमा अस्थायी डम्पिङ साइटको रुपमा उपभोग गरेको पाइएको छ ।
नुवाकोटस्थित बञ्चरेडाँडामा फोहोर विर्सजन गर्न स्थानीयबासीले अवरोध गरेपछि आएको संकट टर्न महानगरले यस क्षेत्रमा फोहोर विर्सजन गरेर अस्थायी रुपमा डम्पिङ साइट बनाएको हो ।
लगातार बस्ती नजिकै रातको समयमा फोहोर ल्याएर फ्याक्न थालेपछि स्थानीयबासी विरोधमा उत्रे पनि महानगरले आफ्नो समस्या नसुनेको स्थानीयहरु बताउछन् । उनीहरुका अनुसार महानगरले स्थानीयको आवाज नसुनी फोहोर पुरेको छ ।
केही दिनअघि फोहोरमा गन्ध नआउन औषधि राख्न आएपछि स्थानीयबासीले घेरा हालेर गाडी नियन्त्रणमा लिएका थिए । महानगरका मेयर चिरीबाबु महर्जन नआएसम्म गाडी नछोड्ने अडान राखेर स्थानीयको विरोधपछि प्रहरीले गाडी नियन्त्रणमा लिएको थियो ।
महानगरका नगरप्रहरी प्रमुख सिताराम हाछेथु विवाद भइरहेको स्थानमा आए पनि विवाद नमिलेपछि फर्केका थिए । भोलिपल्ट स्थानीयको विरोध पछि महानगरले फोहोर पुर्ने भन्दै माथि माथि थोरै माटो राखेर थिचेको थियो ।

स्थानीय विवेशह जंग बस्नेतका अनुसार आफूहरुले धेरै प्रयास गरेर फोहोर उठाएर लैजान आग्रह गर्दा पनि महानगरले नटेरेको बताउछन् । उनका अनुसार लगातार १५ दिन जति रातको ११ बजेपछि बस्ती नजिकै फोहोर ल्याएर राख्दा टोल नै दुगन्धित भएको थियो ।
स्थानीय गंगा लामा फोहोर फ्याकेपछि टोल नै गन्हाउन थालेको बताइन् । उनले भनिन्, ‘हावा चलेको बेला घर बाहिर बस्नै हुदैन ।’
डम्पिङ साइट नजिकै एक कार्यालयमा सुरक्षा हेर्ने दिपकबहादुर मल्लका अनुसार महानगरको गाडीले बाटोमा फोहोर खसालेर समस्या बढेको बताए । भने, ’नजिकै फोहोर राखेको छ । हामीले यही ड्युटी गर्नुपर्छ । कामै छोडौं कि जस्तो पो लाग्छ ।’ उनका अनुसार यहाँ करिव ३ सय टिपर फोहोर राखिएको छ ।

महानगरले माथि माथि माटो राखेर अलि अलि मात्रै पुर्दा दुगन्ध बढेको उनको भनाई छ । । उनले भने, राम्रैसँग पुरेको भए समस्या हुने थिएन । बाहिरबाट हेर्दा सबै फोहोर देखिन्छ । झारा टारेर मात्रै महानगर पञ्छेको छ ।
महानगरको वडा नम्बर ४ का वडाध्यक्ष सन्तोष खड्काले नेप्से म्याक्स नामक नीजि कम्पनीले पैसा लिएर उठाएको फहोर आफ्नो वडामा रहेको टोलमा ल्याएर फ्क्यानु दुभाग्य भएको बताए । उनले भने,‘फोहोर फिर्ता गरेको भनेर हल्ला खल्ला भएको थियो । तर त्यहाँ पुरिएको रहेछ यो गलत हो ।’
मेयर चिरी बाबु महर्जन, कार्यकारी अधिकृत गणेश अर्याललगायतसँग यस विषयमा कुरा गर्न खोज्दा उनीहरु सम्पर्कमा आएनन् ।