साँगामा खोला नभएको ठाउँमा एक करोडको लागतमा झोलुङ्गे पुल, तरेको २० रुपैयाँ

३१ असोज ०७९, भक्तपुर । भक्तपुर सूर्यविनायक नगरपालिकाले खोला नरहेको स्थानमा बनाइएको सार्वजनिक झोलुङ्गे पुल तर्नेसँग शुल्क असुल्दै आएको पाइएको छ।
नगरपालिकाको वडा नं ९ र १० को सिमाना साँगामा बनाइएको झोलुङ्गे पुल तर्नेसँग २० रुपैयाँ असुल्ने गरेका खुलेको हो । यतिबेला, दुईवटा डाँडालाई जोड्न बनाइएको उक्त पुल तरेबापत शुल्क लाग्न थालेपछि यस विषय विवादित बनेको छ ।

नगरपालिकाले पर्यटकीय गतिविधि बढाउने उद्देश्यले सङ्घीय सरकारको सहयोगमा एक करोड छ लाख रुपैयाँको लागतमा पुल निर्माण गरेको हो । पर्यटन क्षेत्रको विकासका लागि शुल्क लिने गरिएको नगरपालिकाका प्रवक्ता रवीन्द्र सापकोटाले बताए ।

सार्वजनिक बिदामा दैनिक सो क्षेत्रको अवलोकन गर्न हजारौंको सङ्ख्यामा पर्यटक पुग्ने गरेको उनले बताए । पर्यटकका लागि थप भौतिक पूर्वाधारको विकास गराउन न्यून शुल्क लिनु परेको उनले बताए ।,

वडा नं ९ र १० का स्थानीयले भने पुल प्रयोग गरेबापतको शुल्क तिर्नु नपर्ने प्रवक्ता सापकोटाले बताए । यस्तै, नगरपालिकाका बासिन्दालाई पनि ५० प्रतिशत छुट दिइएको छ । सार्वजनिक बिदामा अत्यधिक भीड हुने भएकाले सो भीड व्यवस्थापनका लागि रकम उठाइएको नगरपालिकाको भनाइ छ ।