ललितपुर महानगरभित्र १४ सय स्मार्ट लाइट थपिँदै

१९ मंसिर ०७९, ललितपुर। ललितपुर महानगरपालिकाभित्र १४ सय स्मार्ट सडकबत्ती (स्मार्ट लाइट) राख्न थालेको छ । कुपन्डोल, लगनखेल, पुल्चोक, धापाखेल, झम्सीखेल, हरिसिद्धि, बुङमती, खोकना, फर्सीडोल, पाटनढोका, मंगलबजार हुँदै गोदावरी नगरपालिकाको सीमासम्म सडकबत्ती राखिने भएको हो ।

महानगरका अनुसार यसअन्तर्गत चार सय बत्ती जडान भइसकेका छन् । बाँकी पनि चैत मसान्तभित्र जडान भइसक्नेछ । ‘दोस्रो चरणअन्तर्गतको काम सुरु भइसकेको छ । चार सय बत्ती जडानसमेत गरिसकेका छौँ । बाँकी ठाउँमा पनि काम भइरहेको छ,’ महानगरका जुनियर इलेक्ट्रिक इन्जिनियर सञ्जय खड्काले भने । सडकबत्ती जडानमा महानगरको ६० प्रतिशत र नेपाल विद्युत् प्राधिकरणको ४० प्रतिशत सहयोग रहनेछ । उनका अनुसार पहिलो चरणअन्तर्गत बत्ती राखिएका ठाउँहरूबाट सकारात्मक प्रतिक्रिया आएपछि दोस्रो चरणको काम सुरु गरिएको हो ।

दोस्रो चरणअन्तर्गत बत्ती राखिने १५ वटा मुख्य चोकमा धेरै प्रकाश दिने ठूला बत्ती राखिनेछ । पुल्चोकस्थित महानगर कार्यालयअगाडि, जावलाखेल, लगनखेल, बुङमती बसपार्क, लगनखेलको आर्मी पेट्रोलपम्प, गणेशमान पार्कलगायतका चोकमा ठूला बत्ती राखिनेछ ।

महानगरले पहिलो चरणअन्तर्गतको ६ सय स्मार्ट सडकबत्ती जडान फागुन ०७७ मै गरिसकेको छ । यस चरणमा कुपन्डोल, सातदोबाटो, पुल्चोक, ग्वार्को र मंगलबजार क्षेत्रमा सडकबत्ती राखिएको थियो । सवारी दुर्घटनाको प्रमुख कारण अँध्यारो सडक भएकाले सडकबत्ती राख्न थालिएको महानगरले जनाएको छ । पहिलो चरणअन्तर्गतको स्मार्ट सडकबत्ती जडानमा पनि महानगरको ६० र नेपाल विद्युत् प्राधिकरणले ४० प्रतिशत सहयोग गरेको थियो । जसअन्तर्गत सात करोड रुपैयाँ लागेको थियो ।