जबराको निलम्बन फुकुवाविरुद्धको रिट सुनुवाइ गर्न संवैधानिक इजलास गठन

२३ मंसिर ०७९, काठमाडौं ।  सर्वोच्च अदालतले प्रधानन्यायाधीश चोलेन्द्र शमशेर जबराको निलम्बन फुकुवा गर्ने संसद सचिवालयको पत्रविरुद्ध परेको रिटमाथि सुनुवाइ गर्न संवैधानिक इजलास गठन गरेको छ ।

कायममुकायम प्रधानन्यायाधीश हरिकृष्ण कार्कीको नेतृत्वमा सर्वोच्चले संवैधानिक इजलास गठन गरेको हो । संवैधानिक इजलासमा वरिष्ठतम् न्यायाधीश विश्वम्भर प्रसाद श्रेष्ठ, न्यायाधीशहरू ईश्वरप्रसाद खतिवडा, आनन्दमोहन भट्टराई र अनिलकुमार सिन्हा रहेका छन् ।

इजलासमा प्रधानन्यायाधीश जबराको महाभियोग निष्क्रिय भएको पत्र दिने संसद सचिवालयका महासचिव डा. भरतराज गौतमविरुद्धको रिट निवेदनमाथि सुनुवाइ जारी छ ।

सर्वोच्च बार एसोसिएसनका अध्यक्ष पूर्णमान शाक्यसहितका नौ पदाधिकारीले संसद्का महासचिवको पत्रलाई सर्वोच्चको संवैधानिक इजलासमा दिएको चुनौतीमाथि सुनुवाइ भैरहेको हो ।

निवेदनमा ‘महाभियोगबारे निर्णय गर्ने प्रतिनिधिसभाको निरपेक्ष अधिकारमाथि अनुचित बन्देज लगाउँदै महाभियोग प्रस्तावलाई निष्क्रिय पार्ने महासचिवको पत्र संवैधानिक र क्षेत्राधिकारविहीन रहेको’ भन्दै बदर गर्न माग गरिएको छ ।

साथै प्राथमिकतासाथ सुनुवाइ गरी अन्तरिम आदेशबाटै सो पत्र कार्यान्वयनमा रोक लगाउन पनि रिटमा माग गरिएको छ । संवैधानिक इजलासले निवेदकको मागमा अन्तरिम आदेश दिएमा सर्वोच्च फर्कने जबराको अन्तिम प्रयास रोकिनेछ ।