ललितपुरको भाइदेग मन्दिर पुनःनिर्माणका लागि रु १४ लाख सहयोग

ललितपुर, २० चैत । रोटरी क्लब अफ पाटन हेरिटेजले भाइदेग मन्दिर पुनःनिर्माणका लागि रु १४ लाख संस्कृति सम्पदा संरक्षण समूहलाई हस्तान्तरण गरेको छ ।

रोटरी क्लब अफ पाटन हेरिटेजका संस्थापक अध्यक्ष गणेश कार्कीले संस्कृति सम्पदा संरक्षण समूहका अध्यक्ष पृथ्वीबहादुर पाँडेलाई उक्त रकमको चेक हस्तान्तरण गर्नुभएको हो । रोटरीले १९९० सालको भुइँचालोले भग्नावशेष बनाएको पाटन दरबार क्षेत्रको भाइदेग मन्दिर पुनःनिर्माणका लागि सम्पदा यात्रा कार्यक्रम सञ्चालन गरेर सङ्कलन गरेको रकमको चेक उपलब्ध गराएको हो ।

क्लबले गत फागुन ६ गते शिवरात्रिका दिन मङ्गलबजारदेखि कीर्तिपुरको उमामहेश्वर मन्दिरसम्म सम्पदा यात्रा गरेर उक्त रकम जुटाएको थियो । कार्यक्रममा ललितपुर महानगरपालिकाका प्रमुख चिरीबाबु महर्जनले नेपाल सरकारको सार्वजनिक खरिद ऐनका कारण सम्पदा निर्माण तथा पुनःनिर्माणमा गुणस्तरीय काम हुन नसक्ने बताए ।

“सार्वजनिक देवालय, शिवालय तथा मठमन्दिर निर्माणका लागि बोलपत्र आह्वान गर्दा गुणस्तरीय काम हुन सक्दैन, कम गुणस्तरको हुन्छ, त्यसकारण संस्कृति र सम्पदा मासिन पुग्छ, सम्पदा बचाउन र देवालय, शिवालय तथा मठमन्दिरको गुणस्तरीयता कायम गर्न उपभोक्ता समितिमार्फत स्थानीय कलाकार र कालिगढबाट गरिनुपर्छ”, उनले भने ।

उनले महानगरले भाइदेग मन्दिर पुनःनिर्माणका लागि अहिलेसम्म रु एक करोड २३ लाख दिइसकेको जनाउँदै यस वर्षका लागि रु ५० लाख छुट्याइएको जानकारी गराए ।
कीर्तिपुर नगरपालिकाका उपप्रमुख शुभलक्ष्मी शाक्यले सम्पदा जोगाउन सबै एकजुट हुनुपर्ने बताए । उनले भाइदेग मन्दिर पुनःनिर्माणमा गुणस्तरीय काम हुनेमा विश्वास व्यक्त गरे ।

रोटरी डिस्ट्रिक गभर्नर जितेन्द्रबहादुर राजभण्डारीले सम्पदा क्षेत्रको निर्माणमा बोलपत्र आह्वान गरिन नहुनेमा जोड दिँदै सम्पदा प्रेमी मिलेर संरक्षणका लागि क्रियाशील हुनुपर्नेमा जोड दिए ।
उनले रोटरीले गर्ने विभिन्न सामाजिक काम जस्तै सम्पदा यात्रा गरेर ८९ वर्ष अघि भत्किएर लोप भइसकेको मन्दिर पुनःनिर्माणका लागि रकम उपलब्ध गराउनु पनि महत्वपूर्ण काम भएको बताए।