जोगिन्दरले नयाँ टेलिभिजन शो ‘मुखियाजी’ बनाउने

महोत्सवमा त्यो छोटो चलचित्र प्रथम भयो । मेरो भूमिका रुचाइयो । त्यसपछि मैले त्यही चरित्रलाई टेलिभिजन शो र महोत्सवमा प्रयोग गरेँ

३० चैत्र । टेलिभिजनमार्फत ‘जोगिन्दर’को उपनामले परिचित हास्यकलाकार शिवशङ्कर रिजालले नयाँ नाम ‘मुखियाजी’ पाएका छन् । विशेषतः तराईमा अध्यक्षलाई मुखिया भन्ने गरिन्छ । जोगिन्दर र पानवाला भनेर चिनिएका हास्य कलाकार रिजालले मुखियाको नाममा नयाँ टेलिभिजन शो बनाउनु भएपछि दर्शकबाट नयाँ उपनाम पाएको बताएका छन् ।

“महोत्सवमा सहभागी हुँदा जोगिन्दर भनेर सम्बोधन गर्नुहुन्छ । विशेषतः तराईमा जाँदा मुखियाजी भन्नुहुन्छ । यी नामले सम्बोधित हुँदा खुसी लाग्छ । किनकी यी पात्रलाई बनाउन निकै मेहनत लागेको छ”, रिजालले भने ।

जोगिन्दरको उपनाम उनले छोटो चलचित्रमार्फत पाएका हुन् । निर्देशक आशिफ शाहले निर्देशन गरेको एक छोटो चलचित्रमा उनले पान पसलेको भूमिका निर्वाह गरेका थिए । “महोत्सवमा त्यो छोटो चलचित्र प्रथम भयो । मेरो भूमिका रुचाइयो । त्यसपछि मैले त्यही चरित्रलाई टेलिभिजन शो र महोत्सवमा प्रयोग गरेँ”, उनले भने ।

सर्लाहीका बासिन्दा हास्य कलाकार रिजालले तराईकै पात्रलाई आफूमार्फत प्रस्तुत गर्ने गर्छन् । उनले भने, “मैले गर्ने प्रहसनले मनोरञ्जनसँगै सन्देश पनि दिन्छ । जे जस्तो चरित्रलाई हेर्दै हुर्किएँ त्यसलाई नै प्रस्तुत गर्ने गरेको छु ।”

तराईमा मुखियाको आफ्नो छुट्टै मानसम्मान हुन्छ । “पात्रलाई टेलिभिजनसँगै बाहिर पनि प्रयोग गरिरहेको छु । यद्यपि जोगिन्दरलाई पनि छाडेको छैन ।” जोगिन्दरको चरित्रलाई जीवित राख्दै मुखियाजीमार्फत कला यात्रालाई अगाडि बढाउने योजनामा रहेका हास्य कलाकार रिजालले विज्ञापन, म्युजिक भिडियो र चलचित्रमा अभिनय गरेका छन् ।