२५ जेठ । नेपाली चलचित्रसमेत दुई भागमा बन्ने भएको छ । बलिउड र हलिउडले यस्तो शैलीमा बनाएका चलचित्रले सफलता पाएपछि नेपालमा सौरभ चौधरीको निर्देशनमा बन्न लागेको चलचित्र ‘द अनब्रेकेबल ः अगस्त्य’ को दुई भागमा तयार हुने गरी छायाङ्कन सुरु भएको छ । भारतको गोखरपुर मन्दिरमा पूजा गरी सुरु गरिएको छायाङ्कनको तालिका २० दिनको रहेको निर्देशक चौधरीले जानकारी दिएका छन् ।
हिन्दू धर्मका सप्तऋषिमध्येका अगस्त्य ऋषिका नामबाट जुराइएको शीर्षकमै रहेर कथालाई तयार गरेको र दुई भागमा तयार गर्ने योजनासहित सुरु गरेको उनले बताएका छन् । निर्देशक चौधरीले कथा लेखनकै क्रममा एक भागमा नसकिने भएपछि दुई भागलाई नै तयार गरिने योजना बनेको जानकारी दिए । यद्यपि अहिले दोस्रो भागको केही दृश्यमात्र खिच्ने उनको योजना छ ।
निर्देशक चौधरीले भने, “दुई भागमा मात्र कथा सकिने छ, भारतको गोरखपुर र बनारसमा छायाङ्कन सकिएपछि नेपालका काठमाडौँ र नवलपरासीमा बाँकी छायाङ्कन हुने तालिका निर्धारण गरिएको छ ।” चलचित्रमा अभिनेता सौगात मल्ल, मलिका महत, प्रमोद अग्रहरि, रवीन्द्र झा, विजय बराल लगायतका कलाकारले अभिनय गरिरहेका छन् ।
प्रतिक्रिया