विदेशी फिल्मको १५ दिनअघि सेन्सर गर्न आग्रह गर्दै बोर्डको पत्र

११ असार । चलचित्र विकास बोर्डले नेपालमा विदेशी फिल्मको सेन्सर (जाँचपास) प्रदर्शनको १५ दिनअघि गर्ने व्यवस्था गर्न आग्रह गर्दै सञ्चार तथा सूचना प्रविधि मन्त्रालयलाई पत्र लेखेको छ ।

बोर्ड अध्यक्ष भुवन केसीले असार ७ गते पठाएको पत्रमा राष्ट्र, राष्ट्रियता, संस्कृति लगायतका विषयको गाम्भीर्यतालाई मध्यनजर गरी उक्त व्यवस्था गर्न आग्रह गरेका हुन् ।

भारतीय फिल्म ‘आदिपुरुष’लाई लिएर नेपालमा विवाद चलिरहँदा बोर्डले मन्त्रालयलाई पत्राचार गरेको हो । सेन्सर बोर्डका अध्यक्ष तथा मन्त्रालयका प्रवक्ता नेत्रप्रसाद सुवेदीले पनि मन्त्रालयमा पत्र आइपुगेको बताए ।

यो पत्रबारे मन्त्रालय, बोर्ड र सरोकारवालासँग छलफल गरेर चाँडै टुंगोमा पुग्ने उनले बताए ।