गोदावरी छम्पीमा पशु प्राविधिकले स्पिकरमा बाघको आवाज बजाएर त्रसित पारेपछि…

२७ असार । ललितपुरको गोदावरी नगरपालिका ९ छम्पीमा स्पिकरमा ब्लुटुथमार्फत बाघको आवाज निकाल्दै त्रसित बनाउने एक जनालाई गल्ती नदोहोर्याउने सर्तमा छोडिएको छ । डुकुछप टोकलमाठका ईश्वर पाण्डेले स्पिकरमा ब्लुटुथमार्फत बाघको आवाज बजाएर स्थानीयलाई त्रसित बनाएका थिए ।
सोमबार बिहानैदेखि बाघ कराएको आवाज बजाएका उनले मंगलबार पनि उक्त आवाज बजाएका थिए ।
बाघको आवाज आउन बन्द नभएपछि मंगलबार स्थानीयले प्रहरी प्रशासनलाई गुहारेका थिए । स्थानीय र फर्सीडोल प्रहरी प्रभाग प्रमुख मधुसूदन विष्टसहितका प्रहरीले खोजी तीव्र पारे । अन्त्यमा उक्त आवाज डुकुछप टोकलमाठका ईश्वर पाण्डेले स्पिकरमा ब्लुटुथमार्फत बाघको आवाज बजाएको पाइएको थियो ।
गोदावरी नगरपालिका ८ को वडा पशु प्राविधिक (नगरपालिकाका कर्मचारी) समेत रहेका पाण्डेले गल्ती स्वीकार गरेका थिए । उनले यस्तो गल्ती नदोहोर्याउने वाचा गरे ।