सामाखुशी बाढीमा बेपत्ता बालक अझै भेटिएनन्

८ साउन । काठमाडौं सामाखुशीमा बाढीले बगाउँदा बेपत्ता बालक अझै भेटिएका छैनन् । उनको अहिले खोजी कार्य जारी रहेको छ ।
काठमाडौं महानगरपालिका–३ रानीबारीस्थित सामाखुशी खोलाको बाढीले बगाउँदा आइतवार साँझ १३ वर्षीय साजन मगर बेपत्ता भएका थिए ।
उनको खोजी भइरहेको जिल्ला प्रहरी परिसर काठमाडौंले जनाएको छ । सामाखुशीमा बस्दै आएका मगर पानीपोखरीस्थित भानुभक्त मेमोरियल स्कुलको कक्षा ६ मा अध्ययनरत थिए ।
विद्यालयबाट फर्किएपछि उनी साँझ खेल्न निस्केका थिए । मगरको नेपाल प्रहरी र सशस्त्र प्रहरी बलको विपद् व्यवस्थापनको टोलीले खोजी गरिरहेको छ ।