बुढानिलकण्ठमा पहिरो खसेर एक घरमा क्षति

२९ साउन । बुढानिलकण्ठ नगरपालिका वडा नं. ४, पासिकोटमा पहिरो खसेको छ । पासिकोटस्थित कान्तिपुर नमुना बस्तीमा गएराति करिब साढे १ बजेतिर ठूलो आवाजसहित पहिरो खसेको थियो ।
पहिरोले स्थानीय नरेश पाण्डेको घरलाई आंशिक क्षति पुर्याएको बुढानिलकण्ठ नगरपालिकाकी उप–प्रमुख अनिता लामाले जानकारी दिइन् । उनका अनुसार पहिरो लागेर पाण्डको घरको दाहिने मोहडातर्फको कम्पाउण्ड, झ्याल तथा मुख्य गेट र पर्खाललाई गम्भीर क्षति पुर्याएको छ ।

राति ठूलै पहिरो घरमाथिबाट खसेपछि आत्तिएका पाण्डेको परिवारलाई स्थानीय छिमेकीहरूले तत्कालै अर्को घरमा स्थानान्तरण गरी उद्धारमा सहयोग गरेका थिए ।