अभिनेत्री गौरी मल्लले ल्याइन तीज गीत (भिडियोसहित)

२० भदौ । अभिनेत्री गौरी मल्लले तीज विशेष गीत सार्वजनिक गरेकी छन् । काठमाडौंमा पत्रकार सम्मेलन गरी अभिनेत्री मल्लले ‘धिन ताका नाका धिन’ बोलको तीज गीतको भिडियो सार्वजनिक गरेकी हुन् ।
बाल्यकालदेखि गायनमा सौखिन मल्लले वर्षौँ पहिले दर्जन बढी गीत गाएकी थिइन् । उनले चलचित्र ‘भाइ’ मा नायिका मेलिना मानन्धरका लागि पार्श्व गायनसमेत गरेकी थिइन् । यद्यपि उनले आफ्नो गायन करियरभन्दा अभिनय करियरलाई नै अगाडि बढाएकी थिइन् । सार्वजनिक तीज गीतमा शब्द, सङ्गीत र स्वर दिँदै उनी गायनमा फर्किएकी छन् । उनले आफ्नै नामबाट यूट्युब च्यानलसमेत शुभारम्भ गरेकी छन् ।

गीतको भिडियोमा गौरी आफैँले अभिनय गरेकी छन् । गौरीलाई अभिनयमा अभिनेत्री मिथिला शर्माले पनि साथ दिएकी छिन् । साथमा समाइरा श्रेष्ठ, तेन्जु योन्जन, निलम पौडेल, सिम्रन शेरचनलगायतको अभिनय छ । भिडियोलाई सन्तोष राजबाहकले कोरियोग्राफी तथा निर्देशन गरेका छन् । अञ्जु पोखरेल दाहाल म्युजिक भिडियोकी निर्माता हुन् भने सुवास दाहालले निर्माण संयोजन गरेका छन् । उत्सव दाहालको छायांकन र विकास दाहालको सम्पादन रहेको छ ।