ब्रेक शुबाट ३०२ किलो सुन तस्करी भएको सीआईबीको निष्कर्ष, ५० जना प्रतिवादी

२७ भदौ । केन्द्रीय अनुसन्धान ब्युरो (सीआईबी)ले त्रिभुवन विमानस्थलबाट बरामद भएका ६० किलो सुन तस्करी प्रकरणमा ५० जनालाई प्रतिवादी बनाएको छ ।

सुन तस्करीबारे अनुसन्धान गरेको सीआईबीले आज सरकारी वकिलको कार्यालय काठमाडौंमा प्रतिवेदन बुझाउँदैछ । त्यसअघि आयोजित पत्रकार सम्मेलनमा सीआईबी प्रमुख किरण बज्राचार्यले ५० जनालाई प्रतिवादी बनाइएको जानकारी दिइन् ।

सीआईबीले प्रतिवादीमध्ये ३२ जना पक्राउ गरिसकेको छ भने १८ जना फरार रहेक छन् । पक्राउ पर्नेमा २३ जना नेपाली र ९ जना विदेशी नागरिक छन् । फरार हुनेमा १४ विदेश र ४ जना नेपाली नागरिक छन् ।

यस्तै सीआईबीले चिनियाँ समूहले ब्रेक शुबाट ३०२ किलो सुन तस्करी गरेको निष्कर्ष निकालेको छ । ब्रेक प्याडहरुलाई यकिन तौल गरेर ३०२.६२ किलो थप सुन ल्याएको देखिएको सीआईबी प्रमुख बज्राचार्यले बताइन् । गत साउन २ गते ब्रेक सुमा लुकाएर ल्याइएको ६० किलो बढी सुन बरामद भएको थियो ।

सीआईबीले तस्करीमा संलग्नहरूलाई विभिन्न ७ कसुरमा मुद्दा चलाउन मिल्ने प्रतिवेदनमा उल्लेख गरेको छ । सीआईबीले ३ अर्ब ५० करोड, २ लाख १६ हजार ५५२ रुपैयाँ बिगो दाबीसहित प्रतिवेदन बुझाउँदै छ ।