नेम्वाङको राजकीय सम्मानका साथ अन्त्येष्टि, दुई छोराले दिए दागबत्ती

२८ भदौ । संविधानसभा अध्यक्ष एवम् नेकपा एमालेका उपाध्यक्ष सुवास नेम्वाङको राजकीय सम्मानका साथ अन्त्येष्टि गरिएको छ ।बिहीबार पशुपति आर्यघाटमा नेम्वाङको राजकीय सम्मानका साथ अन्त्येष्टि गरिएको हो । नेम्वाङलाई छोराहरू मिङ्सो र सुहाङले दागबत्ती दिएका छन् ।

त्यसलगत्तै नेपाली सेनाको टोलीले शोक धुन बजाएको थियो । त्यसअघि प्रधानमन्त्री पुष्पकमल दाहाल प्रचण्डले नेम्वाङको पार्थिव शरीरमा नेपालको राष्ट्रिय झण्डा ओढाएका थिए । नेकपा एमालेका अध्यक्ष केपी शर्मा ओलीले पार्टीको झण्डा नेम्वाङको पार्थिव शरीरमा ओढाएका थिए ।

नेम्वाङलाई अन्तिम श्रद्धाञ्जली व्यक्त गर्न आर्यघाटमा नेता, सांसद्, कार्यकर्ता, शुभेच्छुक, आफन्त र सर्वसाधारणको बाक्लो सहभागिता रहेको थियो ।