काठमाडौंको पसलहरुमा सुन किन्ने बहानामा चोरी गर्ने चार जना पक्राउ

काठमाडौं
१० असोज । काठमाडौं उपत्यकाका विभिन्न ७ भन्दा बढी स्थानहरुमा सुन किन्ने बाहानामा चोरी गर्ने चार जना युवकहरु पक्राउ परेका छन् ।
स्कुटरको प्रयोग गरेर सुन चोरेको आरापमा पक्राउ पर्नेहरूमा काठमाडौं तारकेश्वर नगरपालिका ९ घर भई काठमाडौं ढुङ्गेधारा बस्ने ३३ वर्षीया रत्न महर्जन, तार्केश्वर नगरपालिका ४ पुरानो गुहेश्वरी बस्ने २२ वर्षीय सुमन पुतुवार, नुवाकोट बेलकोटगढी नगरपालिका ७ घर भई काठमाडौं महानगरपालिका १६ नयाँबजार बस्ने ३६ वर्षीय वीरेन्द्र बिक र भारत महाराष्ट्र घर भई काठमाडौं माछापोखरी बस्ने ३७ वर्षीय हनुमन्त फाँडे रहेका छन् । प्र्रहरीका अनुसार पसलमा गई सुनका गरगहना किन्ने बहाना बनाई चोरी गरी फरार रहेको घटनामा उनीहरुलाई काठमाडौं उपत्यका अपराध अनुसन्धान कार्यालय मिनभवनबाट खटिएको प्रहरीले चोरीमा संलग्न रत्न र सुमनलाई गत शुक्रबार पक्राउ गरेको थियो । थप अनुसन्धानको क्रममा अन्य २ जनालाई सोमबार पक्राउ गरेको हो ।
उनीहरूमध्ये रत्न चोरी गर्ने, सुमन स्कुटर चालक र वीरेन्द्र तथा हनुमन्त चोरी गरेको सुनका गहना खदिद गर्ने व्यक्ति रहेको खुल्न आएको छ ।
उनीहरूलाई थप अनुसन्धानका लागि जिल्ला प्रहरी परिसर काठमाडौं पठाइएको प्रहरीको भनाई छ ।