पटका पड्काउदा भयानक आगलागी, ५० लाखभन्दा बढीको क्षति

इनरुवा
२७ कात्तिक । गएराति सुनसरी सदरमुकाम इनरुवा १ स्थित मुख्य बजारमा पटका पड्काउदा भयानक आगलागी भएको छ ।
सुनसरीका प्रहरी नायब उपरीक्षक नवीनकृष्ण भण्डारीले इनरुवा १ स्थित वृद्धिचन जैनले सञ्चालन गरेको किराना पसलमा लक्ष्मी पूजामा स्थानीयले मनोरञ्जनका लागि पड्काएको पड्का का कारण आगलागी भएको जानकारी दिए

जैनको घर पछाडि रहेको रुखको बोट नजिक खस्दा आगलागी भएको प्रत्यक्षदर्शीले जनाएका छन् ।

आगलागीबाट एउटा काठको घर र घरभित्र सञ्चालनमा रहेको किराना पसल पूर्णरुपमा जलेर नष्ट हुँदा करिब रु ५० लाखभन्दा बढीको क्षति भएको बताइएको छ ।
आगलागीपछि इनरुवा, दुहबी, धरान, कोसी, इटहरी, देवानगञ्ज, रामधुनीलगायतका स्थानबाट आएका बारुणयन्त्र सहित स्थानीयवासी, नेपाल प्रहरी, सशस्त्र प्रहरी, इनरुवा नगर प्रहरीलगायतका सहयोगमा आगलागी नियन्त्रणमा लिइएको थियो । घटनाको विषयमा अनुसन्धान भइरहेको प्रहरीले जनाएको छ ।