काभ्रेमा निस्सासिएर श्रीमानको मृत्यु, श्रीमतीको उपचार हुँदै

१० पुस । काभ्रेमा निस्सासिएर एक जना वृद्धको मृत्यु भएको छ। नमोबुद्ध नगरपालिका वडा नम्बर १ का ८२ वर्षीय कर्मा ग्याल्बो लामाको मृत्यु भएको जिल्ला प्रहरी कार्यालय काभ्रेले जनाएकाे छ ।

कोठामा हिटर र फलामको कराइमा आगो बालेर झ्याल-ढोका बन्द गरी सुतेको कारणले निस्सासिएको उनको मृत्यु भएको अनुमान गरिएको छ ।

सोमबार बेलुकी खाना खाएपछि कर्मा र उनकी ८१ वर्षीया श्रीमती असनी लामाले कोठा न्यानो पार्न हिटर र आगो बालेका थिए। उनीहरू मंगलबार बिहान ८ बजेसम्म पनि नउठेपछि छोरा बुहारीले ढोका खोलेर हेर्दा दुबै जना बेहोस अवस्थामा फेला परेका थिए।

दुबै जनालाई बिहान धुलिखेल अस्पताल लगिएको थियो। कर्माको सवा ९ बजे धुलिखेल अस्पतालमा मृत्यु भएको प्रहरीले जनाएको छ।