चितवनमा बोराभित्र भेटिएका दुवै शवको पहिचान खुल्यो

२३ पुस । चितवनको भरतपुर महानगरपालिका-१२ स्थित मिलनचोकमा मंसिर ६ मा बोराभित्र भेटिएका दुई शवको पहिचान खुलेको छ। जिल्ला प्रहरी कार्यालय चितवनका अनुसार हत्या गरेर बोरामा शव पोको पारेर फालिएका पुरुष र महिला दुवै भारतीय नागरिक हुन्।

भारत मोतिहारी घर भएका उनीहरुको हत्या पनि भारतीय नागरिकले नै गरेको खुल्न आएको प्रहरीले जनाएकाे छ। भरतपुरमा व्यापार गरेर बस्ने उनीहरुको शव हात, खुट्टा र घाँटी डोरीले बाँधेर फालिएको अवस्थामा भेटिएको थियो। शवको पहिचान लामो समयसम्म नभएपछि प्रहरीले पहिलोपटक हुलिया र दोस्रोपटक उनीहरुको स्केच सार्वजनिक गरेको थियो।

नेपाल प्रहरीको विशेष टोलीले भरतपुरमै बसेर भारतीय प्रहरीसँग पनि समन्वय गरेर हत्याको अनुसन्धान गरेका थियाे। हत्यामा संलग्नलाई भारतबाटै पक्राउ गरिएको जनाइएकाे छ। शवहरू भरतपुर अस्पतालमा छन्। महिलाले विवाहेतर सम्बन्ध राखेकाे थाहा पाएपछि पतिले प्रेमीसहितलाई हत्या गराएको खुलेकाे प्रहरीको भनाइ छ।