चलचित्र ‘अगस्त्य’ को व्यापार सुखद

२६ फागुन । चलचित्र ‘अगस्त्य च्याप्टर १’ले व्यापार सुखद रहेको निर्माणपक्षले जानकारी दिएको छ ।
चलचित्र प्रर्दशनको दोस्रो सातामा प्रवेश गरेसँगै देशकै ठूलो मल्टीप्लेक्स चेन क्यूएफएक्सका काठमाडौं र मोफसलका स्टेशनसहित बिग मुभिज्, वान् सिनेमाज्, सिडिसी सिनेमाज्, पोखराको मिडटाउन सिनेमाज्, धरानको फ्रेन्ड्स सिनेमाजमा दर्शकको उपस्थिति दोस्रो सातामा पनि सुखद् रहेको निर्माण पक्षको दाबी छ ।
सौरभ चौधरीको लेखन तथा निर्देशनमा निर्माण गरिएको चलचित्र ‘अगस्त्य’ गत शुक्रबार (फागुन १८)बाट प्रर्दशनमा आएको थियो ।
दर्शकबाट मिलेको सकारात्मक प्रतिक्रिया र बलियो ‘वर्ड अफ माउथ’का साथ काठमाडौं उपत्यकासँगै मोफसलमा दोस्रो सातामा पनि राम्रो व्यापार गरिरहेको निर्माण पक्षको भनाई छ ।
चलचित्रमा सौगात मल्ल, नाजिर हुसेन र खलपात्र प्रमोद अग्रहरी रहेका छन् । चलचित्र हेरे पछि दर्शकले सौगात र नाजिरको एक्सन अवतारको गजब भन्दै तारिफ गरिरहेका छन् । ‘त्रिपाठी’ नामक खलपात्रको रोल रहेको छ । सौगातको मानसिक सन्तुलन गुमेको चरित्रमाबाट दर्शकहरूले मनोरञ्जन लिइरहेका छन् ।

दोस्रो सातामा प्रवेश गरेको उपलक्ष्यमा निर्माण टिमले ‘रोइ राहु जस्तो लाग्छ’ बोलको गीत सार्वजनिक गरेको छ । एसडी योगीको स्वर तथा संगीत रहेको गीतमा राम अविरल विष्टको शब्द छ ।

डार्क हर्स इन्टरटेनमेन्ट र सेभेन सिज इन्टरटेनमेन्टको प्रस्तुति रहेको ‘अगस्त्य’ नेपाल रिलिजको पाँच दिनपछि विहिबारदेखि मध्यपूर्वका मुलुकमा प्रदर्शनमा आएको छ । अन्तर्राष्ट्रिय वितरण कम्पनी सेभेन सिजले यो फिल्मलाई युएई, कतार र बहराइनमा प्रर्दशन गरेको छ ।

मध्यपूर्वका ठूला चेनहरु भक्स स्टार, सिने रोयल, सिनेपोलिस, सिनेको र नोभामा प्रदर्शन सुरु भएको छ । अन्य अन्तर्राष्ट्रिय बजारमा भने यो फिल्म नेपालसँगै प्रदर्शनमा आएको छ ।

फिल्ममा सौगात मल्ल, नाजिर हुसेन, मलिका महत, प्रमोद अग्रहरी, बेन बस्नेत, विजय बराल, रवीन्द्र झा, शिशिर बाङ्देल, निश्चल बस्नेत, सिम्रन खड्का, प्रकाश दाहाल, प्रदीप ढकाल, गजेन्द्र त्रिपाठी, सचिन चन्द्रलगायतका कलाकारको अभिनय छ । विश्व गौचन र अभिषेक चौधरी कार्यकारी निर्माता तथा प्रकाश मल्ल, अनिस तामाङ र विनोद पौडेल निर्माता रहेको फिल्ममा सञ्जय लामाको छायांकन, निमेष श्रेष्ठको सम्पादन, कविराज गहतराजको कोरियोग्राफी, श्री श्रेष्ठको द्वन्द्व निर्देशन र एसडी योगीको संगीत छ ।