काठमाडौ महानगरको निःशुल्क शौचालयमा पैसा असुल्दै कर्मचारी, अपाङ्गमैत्री शौचालयमा पसल

ललितखबर
१८ चैत्र । काठमाडौं महानगरको महाँकालमा महानगरले सञ्चालन गरेको निःशुल्क शौचालयमा कर्मचारीले पैसा असुल्ने गरेको खुलेको छ ।
काठमाडौं महानगर २२ वडाले केही महिनाअघि सञ्चालन गरेको निःशुल्क भन्दै नयाँ सडकनजिकै महाकाल मन्दिरपरिसरमा शौचालय शौचालयमा गरेको थियो । सो शौचालयमा कर्मचारी विजय देउलाले टोकरी राखेर पैसा असुल गर्ने गरेका हुन् ।

महिला पुरुष र अपांगमैत्री तीन वटा शौचालय मध्ये अपांगमैत्री शौचालयमा उनले पसल राखेका छन् । शौचालयअगाडि सामान झुण्डाइएको छ भने भित्र पोकापन्तरा राखिएको देखिन्छ ।
पसल राख्दा अपांगता भएका मानिस शौचालयमा जान समस्या हुने सन्र्दभ जोडेर ललितखबरले प्रश्न गर्दा देउलाले मान्छे आए आफूले सामान निकालेर बाहिर बस्ने बताए ।
निशुल्क शौचालयमा रकम असुल गरिरहेको अवस्थाको तस्विर खिच्न खोज्दा देउलाले तस्विर नखिच्न धम्क्याउदै भने, ‘यो मेरो घर हो । म बस्ने भएपछि मैले पैसा लिन्छु । पत्रकार भएर फोटो खिच्न पाइदैन ।’
निःशुल्क शौचालयमा पैसा असुल गरेको र पसल सञ्चालन गरेको विषयमा महानगरको २२ नम्बर वडाध्यक्ष चिनीकाजी महर्जनसंग प्रश्न गर्दा उनले कर्मचारीको उल्टै बचा उगर्दै पैसा असुल गर्न आफूहरुले नै सहुलियत दिएको बताए ।
उनलाई १६ हजार तलव दिइएको र परिश्रमिक नपुगेको भएर आफूहरुले पसल राख्न र पैसा असुल गर्न सहुलियत दिएको उनको भनाई छ । उनले निःशुल्क शौचालयमा पैसा असुल गरेको विषयलाई इस्यु नबनाउन आग्रह गर्दै संवावददातालाई फोन गरेर माफी माग्न लगाउने बताए ।
उनले भने, ‘गरिवले दिसापिसाप गर्ने ठाँउमा काम गरिरहेको छ । यो कुरालाई ठूलो नबनाउनुस् । आउनुस् वडा कार्यालयमा चिया खाऔं ।’
कर्मचारी देउलाले भने ४२ हजार तलव लिने गरेको दाबी गरेका छन् ।