चलचित्र ‘मनसरा’ प्रदर्शन,‘बोक्सीको घर’ दोश्रो हप्तामा

काठमाडौं
२१ वैशाख । आजबाट नेपाली चलचित्र ‘मनसरा’ प्रदर्शनमा आएको छ । बुधबारदेखि नै अग्रिम बुकिङ खुला भएको चलचित्र आजबाट देशभरका चलचित्र भवनहरुमा प्रर्दशन सुरु भएकोे हो ।

उपेन्द्र सुब्बाको लेखन तथा निर्देशन रहेको चलचित्रले प्रिमियरमा राम्रो प्रतिक्रिया पाएको थियो। प्रिमियरमा पाएको प्रतिक्रियाले निर्माणपक्ष उत्साही देखिएको छ।

क्यूएफएक्सले अग्रिम बुकिङ खुला गर्दा देशभरका आफ्ना आउटलेटमा ‘मनसरा’लाई ६९ शो दिएको थियो। काठमाडौंमा २८ र मोफसलमा ४१ शो प्रदान गरिएको छ।

सोसल ड्रामा सिनेमामा प्रविण खतिवडा, दयाहाङ राई, मिरुना मगर र मेनुका प्रधान मुख्य भूमिकामा छन्।
चलचित्र ‘बोक्सीको घर’ दोश्रो हप्तामा
गत बैशाख १४ गतेबाट प्रर्दशन सुरु भएको चलचित्र ‘बोक्सीको घर’ दोश्रो सातासम्म निरन्तर प्रर्दशन भइरहेको छ । अभिनेत्री केकी अधिकारीको निर्माण तथा अभिनय रहेको चलचित्रमा बोक्सी र वालविवाहको कुसंस्कारविरुद्ध बुलन्द आवाज उठाइएको छ । चलचित्रले साताभर ६ करोडभन्दा धेरै व्यापार गरेको भने सिक्वेल निर्माण गर्ने निर्माणपक्षले घोषणा गरिसकेको छ ।