सौगात र बेनिशाको ‘सिटामोल’ को जापानमा प्रदर्शन अधिकारको सम्झौता

काठमाडौँ
३० वैशाख। अभिनेता सौगात मल्ल र अभिनेत्री बेनिशा हमालको मुख्य भूमिका रहेको चलचित्र ‘सिटामोल’ जापानका लागि ओभरसिज राइट्स बिक्री भएको छ ।

गरिमा फिल्म्सले यो चलचित्रको जापान प्रदर्शन अधिकार किनेको हो । चलचित्रलाई नेपाल र जापानमा एकैदिन रिलिज गर्ने सहमतिअनुसार प्रदर्शन अधिकार बिक्री गरिएको जनाइएको छ ।
लेखक तथा निर्देशक राजबहादुर सानेले जापानमा प्रदर्शन अधिकार बिक्री भएको र अन्य देशबाट पनि चलचित्र प्रर्दशनका लागि प्रस्ताव आएको बताएका छन् ।

चलचित्रको प्रदर्शन मिति भने केही दिनमा घोषणा गरिने उनको भनाई छ । चलचित्रको अझै केही प्रतिशत छायांकन बाँकी छ, जुन काठमाडौंमा खिच्ने तयारी गरिएको छ । माओवादी–सशस्त्र युद्धको समयको कथामा बनेको चलचित्रमा सौगातले जनयुद्धको घाइतेको भूमिका निभाएका छन् ।

तुलसी देवी फिल्मको प्रस्तुति रहेको फिल्ममा लोकेन्द्र लेखक, भुगोल कार्की, हिउँवाला गौतम, दिनेश रेग्मी, समिप निरौला आदिको पनि अभिनय रहेको छ । बाबुल गिरीको संगीत रहेको फिल्ममा दिव्य सुवेदीको छायांकन छ । भुगोल कुमार कार्की निर्माता रहेको फिल्मको कार्यकारी निर्मातामा रामचन्द्र उपाध्यय, अप्सरा नेपाली, गंगाराम श्रेष्ठ, अजय कुमार बिक र कुमार केसी छन् ।