चलचित्र ‘पूर्ण बहादुरको सारङ्गी’मा कलाकारहरु विनोद, भोलाराज र देशभक्त अनुबन्धित

काठमाडौं
३ जेठ । चलचित्र ‘पूर्ण बहादुरको सारङ्गी’मा कलाकारहरु विनोद न्यौपाने, भोलाराज सापकोटा र देशभक्त खनाल अनुबन्धित भएका छन्
अन्तर्राष्ट्रिय रुपमा चलचित्र वितरण गर्दै आएको कम्पनी सेभेन सिज इन्टरटेनमेन्टले निर्माण गर्न लागेको चलचित्रका लागि मुख्य भूमिकामा गायक तथा कलाकार प्रकाश सपूत र मुकुन भुसाल यसअघि नै अनुबन्धित भइसकेका छन् ।
सेभेन सिज सिनेमाको प्रस्तुतिमा बन्न लागेको यो चलचित्रमा प्रकाश र मुकुन पछि थप तीन जना कलाकारहरू अनुबन्धित गराएको हो ।
चलचित्रमा उनीहरुको भूमिकाको बारेमा अहिले केही पनि खुलाइएको छैन ।

‘पूर्ण बहादुरको सारङ्गी’मा पनि उनीहरूलाई शीर्ष भूमिका देख्न सकिने निर्माता विनोद पौडेलले जनकारी गराएका छन् ।

सोसल–ड्रामा बन्ने चलचित्रका मौलिक कथाको एक गहन विषयलाई उठान गर्न लागेको बताइएको छ । चलचित्रका लेखक तथा निर्देशक सरोज पौडेल हुन् ।

जेठको दोस्रो साताबाट छायांकनमा जाने तयारी गरेको चलचित्रको लागि अभिनेता र अन्य कलाकारहरू फाइनल भए पनि निर्माण पक्षले अभिनेत्री र अन्य कलाकारका बारेमा गोप्य राख्न चाहेका छन् ।

यो चलचित्रको प्रदर्शन मिति आउँदो वर्षलाई तोकिएको छ । करिब दुई हप्ता अघि चलचित्रको नाम र मोसन पोस्टर सार्वजनिक गरेको निर्माण टिमले चलचित्रलाई विं.सं.२०८२ सालभित्र विश्व बजारमा प्रदर्शन गर्ने लक्ष्य राखेको छ ।

चलचित्रमा विनोद पौडेल र प्याट्रिक सुवेदीको लगानी रहनेछ । रमेश चौलागाईं र हरि श्रेष्ठ चलचित्रका कार्यकारी निर्माता हुन् । महेश दवाडीको पटकथा तथा संवाद रहन चलचित्रमा प्रशान्त सिवाकोटीको संगीत रहने छ ।