राजधानीका चलचित्र भवनमा मध्यराती चलचित्र हेर्नेको भीड

ललितखबर
१६ जेठ । राजधानीको चलचित्र भवनमा मध्यराती चलचित्र हेर्नेको दर्शकको भीड देखिएको छ ।
चलचित्र पुजार सार्कीका अभिनेता पल शाह मंगलबार राती राजधानीको चावहीलस्थित एक हलमा प्रतिकृया लिन पुग्दा भीड रहेको भीडियो सार्वजनिक गरेका छन् । चलचित्रका निर्देशक दिनेश राउतले राती १० बजेर ३० मिनेटमा सुरु भएको चलचित्र हाउसफुल रहेको तस्विर सार्वजनिक गरेका छन् ।
उनले अधिकाशं हलहरु हाउसफुल भएको जानकारी दिएका छन् ।
उता चलचित्र फर्की फर्कीका अभिनेता अनमोल केसीले पनि हाउसफुल भएको भिडियो सार्वजनिक गरेका छन् ।
गत विहीबारबाट प्रर्दशन सुरु भएको चलचित्र फर्की फर्की र पुजार सार्की देशभरका अधिकांश हलहरुमा हाउसफुल भएको निर्माताहरुले बताएका छन् ।
चलचित्र ‘पूजार सार्की’ मा अभिनेताहरु आर्यन सिग्देल, प्रदीप खड्का र पल शाहको अभिनय रहेको छ । यस चलचित्रलाई राष्ट्रिय अवार्ड विजेता दिनेश राउतले निर्देशन गरेका हुन् । सामाजिक विषयमा चलचित्र बनाउने निर्देशक राउतले यसअघि ‘प्रसाद’ र ‘प्रकाश’ जस्ता चलचित्र बनाएका थिए ।
सुवास भुसालको निर्माण रहेको चलचित्रमा आर्यनको जोडी अञ्जना बराइलीसँग बाँधिएको छ भने प्रदीपको अपोजिटमा परीक्षा लिम्बूले अभिनय गरकी छन् ।
चलचित्र अन्तरजातीय प्रेमको कथामा बनेको छ । विकास सुवेदीको लेखन रहेको चलचित्रमा मोहन निरौला, लोकेन्द्र लेखक, शङ्कर आचार्य, प्रेम सुब्बा, सुभास गजुरेल, विद्या कार्की, बसन्त भट्ट लगायतको पनि अभिनय छ ।
त्यस्तै अनमोल केसी र जसिता गुरुङको प्रमुख भूमिका रहेको चलचित्र फर्की फर्की‘टाइम लुप’ को कथामा बनेको छ । यस चलचित्रलाई सुयोग गुरुङले लेखन तथा निर्देशन गरेका हुन् ।
अनमोलका पछिल्ला चलचित्रले बक्स अफिसमा राम्रो नगरेको अवस्थामा फर्की फर्की बक्स अफिसमा सफल हुनुपर्ने दबाब अनमोलमाथि रहेको छ ।