बलिउड अभिनेता अनुपम खेरको कार्यालयबाट पैतालिस लाख भारु बराबर सरसामान चोरी

काठमाडौँ
७ असार । बलिउड अभिनेता अनुपम खेरको मुम्बईस्थित वीरा देसाईको कार्यालयमा चोरी भएको छ ।

कार्यालयको लेखा विभागको सेफ बाकस लिएर चोरहरु फरार भएको अभिनेता खेरले जानकारी दिएका छन् । यति मात्र होइन, चोरहरूले चलचित्रको नेगेटिभ बक्स पनि साथमा लगेको उनले बताएका छन् । सीसीटीभी फुटेजमा चोरहरू अटोमा बसेको देखिएको र मुम्बई प्रहरीमा उजुरी दिएको बताए ।

अनुपम खेरले बताएका छन्– ’हिजो राति मेरो वीर देसाई रोडको अफिसमा दुईजना चोरले मेरो अफिसको दुई वटा ढोका तोडेर लेखा विभागको पूरै सेफ (जुन सायद तोड्न सकेनन्) र हाम्रो कम्पनीले निर्माण गरेको चलचित्रको नेगेटिभ सामान चोरेर लगेका थिए । हाम्रो कार्यालयले एफआईआर दर्ता गरेको छ । सीसीटीभी क्यामेरामा दुवैजना सामान बोकेर अटोमा बसेको देखिएकाले छिट्टै चोरहरु समातिने प्रहरीले आश्वासन दिएको छ । भगवानले उनिहरुलाई सद्बुद्धि दिउन ।

चोरहरूले ताला तोडेर नगद सहित करिब पैतालिस लाख  भारु बराबरको सामान चोरेको प्रहरी अधिकारीले बताए ।