सुनकोसी दुर्घटनाः जिप भेटियो, सवार तीन जना अझै बेपत्ता

९ भदौ । शनिबार सुनकोसीमा खसेको बोलेरो जिप भेटिएको छ ।

शनिबार सिन्धुलीको गोलञ्जोर गाउँपालिका– १, कुँडुलेबाट हलेसिबाट काठमाडौंतर्फ आउँदै गरेको प्रदेश ३–०१–०२३ च ६३६६ नम्बरको जिप सुनकोसीमा खसेको थियो । उक्त जिपलाई गोताखोर टोलीले आज बिहान २ बजेतिर फेला पारेको हो । जिप फेला परे पनि त्यसमा सवार तीन जना भने अझै बेपत्ता छन् ।

जिपमा चार जना सवार रहेकामा एक जनाले भने हामफालेर ज्यान बचाएका थिए । जिपमा भक्तपुरको सूर्यविनायक नगरपालिकाका ३२ वर्षीय अबिन बाँके, ३० वर्षीय प्रनित स्यागु, ३७ वर्षीय बलराम घटुवा र सुशासन्त कक्षपति सवार थिए । त्यसमध्ये कक्षपतिले हाम फालेर ज्यान जोगाएका थिए ।

बेपत्ताहरूको खोजी कार्य जारी रहेको प्रहरीले जानकारी दिएको छ । सशस्त्र प्रहरी बलको विपद व्यवस्थापन बेस खुर्कोटबाट गोताखोरसहितको टोली खोजी कार्यमा खटिएको छ ।