पशुपतिमा लगाइएको कोटीहोममा ७२ लाख ५० हजार घाटा

ललितखबर

२७ भदौ । गत साउन महिनाभर पशुपतिमा लगाइएको कोटीहोममा ७२ लाख ५० हजार ३०४ रूपैयाँ घाटा भएको छ । कोटी होमको सम्बन्धमा काठमाडौंमा बिहीबार आयोजित पत्रकार सम्मेलनमा दिइएको जानकारी अनुसार कोटीहोम २० करोड १५ लाख ८२ हजार ४९० चन्दा उठेको छ भने केही जिन्सी र धातुका पैसा हिसाब गरीएको छैन । १ देखि २ करोडसम्म उठ्न बाँकी रहेको पत्रकार सम्मेलनमा जानकारी दिइएको छ । महायज्ञमा २० करोड ८८ लाख ३२ हजार ७९४ खर्च भएको छ ।

फाउण्डेसनले ललितपुरको गोदावरी क्षेत्रमा मामाघर र भक्तपुरको ताथलीमा छोरीको घर आश्रम सञ्चालन गरिरहेको छ । फाउन्डेसनका अध्यक्ष वालयोगेश्वर विजय कृष्णमूर्तिले दुबै आश्रम भाडामा सञ्चालन भइरहेको र दिगो रूपमा सञ्चालनका लागि जग्गा खरिद गरेर भवनलगायत संरचना निर्माण गर्न महायज्ञ आयोजना गरिएको जानकारी दिए ।

उनले कोटी होम सफल बनाउन सञ्चारकर्मी र पत्रकारको उल्लेख्य भूमिका रहेको भन्दै तारिफ गरे । कोटीहोम आयोजनाका लागि फाउण्डेसनले दुई वर्षसम्म मेहनत गरेको पत्रकार सम्मेलनमा जानकारी दिइएको थियो ।

महायज्ञमा पत्रकारहरूमाथि हातपात भएको सन्दर्भमा अध्यक्ष कृष्णमूर्तिले माफी मागेका थिए । महायज्ञमा केही कमी कमजोरी भएको अनुभव सुनाउदै फाउण्डेसनका अध्यक्ष कृष्णमूर्तिले आउँदा दिनमा व्यवस्थित बनाउने बताए ।