एनालग अपरेटिङ सिस्टमबाट डिजिटल डी– कनेक्ट मा रूपान्तरण गर्ने काम सम्पन्न भएको छ
३१ भदौं । नेपालकै पहिलो केबुलकार मनकामना केबुलकार अत्याधुनिक प्रविधिमा स्तरोन्नतिपछि मंगलबारदेखि पुनः सञ्चालनमा आउने भएको छ । २ महिनाको मर्मत सम्भार पछि असोज १ गते बिहानैदेखी पुनः सञ्चालनमा आउने भएको हो ।
प्रा.लिका प्रबन्ध निर्देशक राजेशबाबु श्रेष्ठका अनुसार गतअसार ३१ गते देखी मर्मत सम्भारको लागि पूर्ण रूपमा बन्द रहेको केबुलकार असोज १ गते बिहानैदेखि नियमित रूपमा सञ्चालनमा आउने लागेको हो ।
केबुलकारको मुख्य लठ्ठा र डिजिटल डी–कनेक्ट प्रणालीमा जाँदा मनकामना दर्शन प्रालिले करिब ५० करोड खर्च गरेको
अत्याधुनिक प्रविधिमा स्तरोन्नति गर्न २ महिनादेखि बन्द केबुलकारको सम्बन्धमा प्रबन्ध निर्देशक राजेशबाबु श्रेष्ठले भने, ‘ एनालग अपरेटिङ सिस्टमबाट डिजिटल डी– कनेक्ट मा रूपान्तरण गर्ने काम सम्पन्न भएको छ ।’
स्थापनाको २६ वर्ष पछि केबुलकारलाई एनालगबाट डिजिटल प्रणालीमा रूपान्तरण गरिएको हो । केबुलकारलाई डी–कनेक्ट प्रणालीमा लान अस्ट्रियाको विश्वविख्यात केबुलकार निर्माता कम्पनी डोपलमेयरका इन्जिनियर तथा प्राविधिकहरूको प्रत्यक्ष सहभागिता र सुपरिवेक्षणमा स्तरोन्नतिको काम सम्पन्न भएको कंम्पनीले जनाएको छ ।
केबुलकारको मुख्य लठ्ठा र डिजिटल डी–कनेक्ट प्रणालीमा जाँदा मनकामना दर्शन प्रालिले करिब ५० करोड खर्च गरेको निर्देशक श्रेष्ठले बताए ।
२०५५ साल मङ्सिर ८ गते देखी विधिवत् रूपमा सञ्चालनमा आएको केबुलकारले चितवनको चेरेशमा बटम स्टेसन र गोरखाको मनकामना मन्दिर छेवैमा टप स्टेसन राखी मनकामना मन्दिर आउजाउ गर्नेहरूका लागि सेवा प्रदान गर्दै आएको छ ।
प्रतिक्रिया