सुनको मूल्य अहिलेसम्मकै उच्च विन्दुमा

छापावाला सुनको मूल्यमा नयाँ कीर्तिमानसँगै आजका लागि रु एक लाख ५८ हजार आठ सय निर्धारण भएको छ

काठमाडौँ
६ असोज । नेपाली बजारमा आज सुनको मूल्य बढेर अहिलेसम्मकै उच्च विन्दुमा पुगेको छ । छापावाला सुनको मूल्यमा नयाँ कीर्तिमानसँगै आजका लागि रु एक लाख ५८ हजार आठ सय निर्धारण भएको छ ।

लगातार वृद्धि हुँदै आएको सुनको मूल्यमा आज भएको वृद्धिपछि हालसम्मकै उच्च मूल्य कायम भएको हो । अन्तर्राष्ट्रिय बजारमा पनि लगातार सुनमा मूल्य वृद्धि हुँदा त्यसको प्रभाव नेपाली बजारमा परेको हो ।

नेपाल सुनचाँदी व्यवसायी महासङ्घका अनुसार आज तोलामा रु एक हजार सात सयले वृद्धि भएको छ । शुक्रबार प्रतितोला रु एक लाख ५७ हजार एक सयमा कारोबार भएको असोज १ गतेको तुलनामा आजको मूल्यसूची अनुसार छापावाला सुन तोलामा रु दुई हजार एक सयले वृद्धि भएको छ ।

यस्तै, चाँदीको मूल्य तोलामा रु पाँचले वृद्धि भएको छ । शुक्रबार प्रतितोला रु एक हजार नौ सय १५ मा कारोबार भएको चाँदी आजका लागि भने रु एक हजार नौ सय २० निर्धारण भएको छ ।