भुवन केसी बने शेफर्ड कलेजको सद्भावना दूत

कलाकार केसीले कलेजले चलचित्रको अध्ययन अध्यापन सुरु गरेकोमा खुसी व्यक्त गरे

काठमाडौं
२० असोज । भुवन केसी शेफर्ड कलेज अफ मिडिया टेक्नोलोजीको विशेष सद्भावना दूत नियुक्त भएका छन् ।
आइतबार भएका सम्झौतामा कलाकार निर्माता भुवन केसी र कलेजबीच सम्झौतापत्रमा हस्ताक्षर भएको हो । सम्झौतापत्रमा कलाकार केसी र कलेजको तर्फबाट प्रवन्ध निर्देशक तरुणप्रताप शाहले हस्ताक्षर गरे ।
सम्झौता अनुसार कलाकार केसी कलेजका विभिन्न प्रवद्र्धनात्मक कार्यक्रमहरुमा सहभागी हुनेछन् । उनले आफ्नो सामाजिक सञ्जाल, निर्माता कम्पनी सुपर काजल फिल्म्सको ब्यानरमा बन्ने चलचित्रमार्फत कलेजको प्रवद्र्धन गर्ने सहमति भएको छ ।

कलाकार केसीले कलेजले चलचित्रको अध्ययन अध्यापन सुरु गरेकोमा खुसी व्यक्त गरे । शेफर्ड कलेजका प्रवन्ध निर्देशक तरुणप्रताप शाहले कलाकार केसीसँगको सहकार्यले चलचित्र एजुकेशन अझ राम्रो हुने विश्वास व्यक्त गरे ।
स्नातकोत्तर तहमा नेपालमै पहिलोपल्ट चलचित्रको पढाइ शेफर्ड कलेजले सुरु गरेको जानकारी दिँदै उनले प्रविधिको विकाससँगै विद्यार्थीहरुको रुचिअनुसार समसामयिक विषयहरु थप गर्दै लैजाने जानकारी दिए ।

चलचित्र ‘जुनी’ बाट करिअर सुरु गरेका केसीले एक सयभन्दा बढी फिल्ममा अभिनय गरिसकेका छन् । हाल उनी निर्माता तथा निर्देशक पनि हुन् । साथै उनले चलचित्र विकास बोर्डको समेत नेतृत्व गरिसकेका छन् ।