‘गुन्युचोलो’ अमेरिकाको तस्बिर चलचित्र मार्केटमा छनोट

जहाँ अमेजन एमजीएम स्टुडियो, पिलर्स फण्ड, ब्लमहाउस एचबीओ, सीएए, क्रिएटिभ ल्याण्ड स्टुडियोजस्ता प्रतिष्ठित चलचित्र संस्था पनि सहभागी हुनेछन्

काठमाडौँ
१ कात्तिक । नेपाली चलचित्र ‘गुन्युचोलो’ अमेरिकाको प्रतिष्ठित तस्बिर फिल्म मार्केटमा छनोट भएको छ ।

लैङ्गिक अल्पसङ्ख्यक पारालैङ्गिक पात्रको कथामा बनेको समुद्र भट्टले निर्देशन गरेको चलचित्र अक्टोबर १७ देखि २० सम्म अमेरिकाको सियाटलमा आयोजना हुने तस्बिर फिल्म मार्केटका लागि छनोट भएको हो ।
जहाँ अमेजन एमजीएम स्टुडियो, पिलर्स फण्ड, ब्लमहाउस एचबीओ, सीएए, क्रिएटिभ ल्याण्ड स्टुडियोजस्ता प्रतिष्ठित चलचित्र संस्था पनि सहभागी हुनेछन् ।

तस्बिर चलचित्र फेस्टिभलका संस्थापक र निर्देशक रीता मेहरले यस फेस्टिभललाई अस्कर योग्य दक्षिण एसियाली चलचित्र फेस्टिभलको रूपमा विकास गरिने बताएका छन् ।

फिल्म ‘गुन्युचोलो’मा नाजिर हुसेनको मुख्य भूमिका छ । चलचित्रमा उनले पारालैङ्गिक महिला (ट्रान्सवुमन)को भूमिका निर्वाह गरेका छन् । चलचित्रमा नाजिरका साथ सञ्चिता लुइँटेल, सुशील सिटौला, राजकुमार घोष, शिशिर राणा, अनुपम श्रेष्ठ र विशाल पहारीले पनि महत्वपूर्ण भूमिका निर्वाह गरेका छन् ।
नेपालको पहिलो पूर्ण ‘ट्रान्सस्टोरी’मा निर्मित यस चलचित्रको अन्तर्राष्ट्रिय वितरण अधिकार अमेरिकाको बफेलो एट्लेले किनेको छ ।