खेम सेन्चुरीलाई शिव परियारको सुझाव ‘अरू जस्तो बन्ने प्रयास नगर्नु’

काठमाडौं । गायक शिव परियारले आफूलाई छोडेर अरू जस्तो बन्ने प्रयास नगर्न खेम सेन्चुरीलाई सुझाएका छन् । भ्वाइस अफ नेपालमा जर्जको रुपमा बर्जर बजाउने सिलसिलामा उनले खुट्टाले बर्जर थिचेको विषय सामाजिक सञ्जालमा व्यापक आलोचना हुन थालेपछि परियारले यस्तो सुझाव दिएका हुन् । खुट्टाले बर्जर थिच्ने नक्कल उनले अरू कसैबाट गरेको परियारको धारणा छ ।

‘खेम भाइ भिडियो हेर्दा अलिकति अस्वाभाविक चैँ मलाई पनि लाग्यो है । भविष्यमा आफूलाई छोडेर अरू कोही जस्तो बन्ने चेष्टा नगर्नु’, परियाले सामाजिक सञ्जाल मार्फत भनेका छन् ‘मौलिक खेम सेन्चुरी नै नेपाली लोकसंगीतलाई प्रिय अनि आवश्यक छ । आफूलाई छोडेर अरुजस्तो बन्ने प्रयास गर्दा प्रायः नकारात्मक अवस्थाहरु भोग्नुपर्ने हुन्छ । भाइ जत्तिको कलाकारले आगामी दिनमा बिचार गर्नुपर्छ ।’

परियारले सङ्गीतमा केही बखेडा हुने बित्तिकै जात, धर्म, वर्गमाथि प्रहार हुने भन्दै प्रहार रोकिनुपर्ने धारणा समेत राखेका छन् ।

‘मैले पढेको सङ्गीतको शास्त्रमा सङ्गीतको कुनै जात, धर्म, वर्ग, रङ्ग र भूगोल हुँदैन भनेर नै लेखिएको छ । म त्यही शास्त्रको लेखाई अनुसार नै सङ्गीतमा जीवन बाँच्ने यात्रा मै छु, प्रयास गरिरहेको छु’, उनले अगाडि भनेका छन् ‘तर मेरो देशमा सङ्गीतकर्मी कलाकारको केहि बखेडा आउनसाथ सुरुमा जात र वर्गमा नै प्रहार गर्ने गरिएको छ । यस पटक कलाकार खेम सेन्चुरी भाइको हकमा पनि यस्तै भयो । परियारले सामाजिक सञ्जालमा जात भनेर गाली गर्नेहरू सङ्गीतका श्रोता नभएर जातका श्रोता र हिमायती भएको टिप्पणी गरेका छन् ।