चलचित्रमा रङ्ग संयोजनमा सक्रिय गहतराज निर्देशनमा सक्रिय

काठमाडौँ
रङ्ग संयोजनमार्फत चलचित्र क्षेत्रमा सक्रिय जुनिम गहतराज पछिल्लो समय आफ्नै निर्देशनमा चलचित्र लिएर आएका छन् ।
एक दशकदेखि रङ्ग संयोजनमा सक्रिय रहेका जुनिम गहतराजको निर्देशनमा चलचित्र ‘ताण्डवम्’ तयार भएको हो ।
उनले भने, “रङ्ग संयोजनमार्फत चलचित्र क्षेत्रमा सक्रिय भए पनि मैले निर्देशक विधा पनि अध्यन गरेको छु । विचार मिल्दो समूह जुटेका कारणले मैले निर्देशकको रूपमा अगाडि बढ्ने योजना बनाएको हुँ । सुरुमा नेपालमा बनिरहेका भन्दा फरक चलचित्र दर्शकसामु ल्याउँदै छु ।”
चलचित्रका निर्देशक गहतराजले आफ्नो पहिलो सन्तानको स्वागतमा रहेको नवविवाहित जोडीको जीवनमा अकल्पनीय घटनाले निम्त्याउने घटनाक्रमलाई चलचित्रको विषय बनाइएको बताएका छन् ।
निर्देशक गहतराजले पारिवारिकसँगै ‘एक्सन थ्रिलर’ विधामा तयार भएको सो चलचित्रले दर्शकलाई नयाँपन दिने बताएका छन् । यसमा पुष्कर गुरुङ, प्रेम सुब्बा, सरिना मगर, अङ्कित खड्का, अनोज पाण्डेलगायत कलाकारले अभिनय गरेका छन् ।
यस चलचित्रमा हरि घले लामाले छायाङ्कन, सम्राट बस्नेतले द्वन्द्व निर्देशन, सुशान्त गौतमको सङ्गीत र कोबिद बज्रले पाश्र्वसङ्गीत सृजना, अनिरुद्ध आत्रेय र हुसेनले पटकथा लेखन गरेका छन् ।