हास्यकलाकार सजन श्रेष्ठले धम्की आएको भन्दै उजुरी दिन पुगे प्रहरी कार्यालय

काठमाडौं
हास्यकलाकार सजन श्रेष्ठ आफू र आफ्नो परिवारलाई धम्की आएको भन्दै उजुरी लिएर प्रहरी कार्यालय पुगेका छन् ।

श्रेष्ठले आइतबार प्रहरीको साइबर ब्युरो भोटाहिटी पुगेर उजुरी दिएका हुन् । उनले रिदय ताम्राकार नामक फेसबुकबाट आफूलाई अनि दिदीहरूलाई पनि धम्की दिएको उल्येख गरेका छन् । उनले दोषीलाई विद्युतीय कारोबार ऐनको दफा ४७ अन्तर्गत कारबाही गर्न माग गरेका छन् ।
उनले केही दिनअघि आफूले एन्जाइटीको औषधि खाइरहेको बताउदै आफूलाई धम्क्याए पनि सहेको तर परिवारलाई समेत धम्क्याएपछि उजुरी दिन लागेको बताएका थिए ।
उनले भिडियो सन्देश जारी गर्दै आफ्नो दिदीहरुलाई धम्क्याएको विषयलाई गम्भिर रुपमा लिएका बताएका छन् । उनले दिदीको तस्विर नै राखेर अपराधिक कृयाकलाप गरिदिने धम्की दिएको उजुरीमा उल्येख गरेका छन् । जुन उजुरीको प्रति उनले सामाजिक सञ्जालमार्फत सार्वजनिक नै गरिसकेका छन् ।

गएको फागुन ४ गते भिडियो फेसबुकमा अपलोड गरेको र त्यसको एक दिनपछि रिदय ताम्राकार नामक फेसबुक प्रोफाइलले आफ्नो परिवारको फोटो राखेर धम्क्याएको बताएका छन् ।
हास्यकलाकार श्रेष्ठले आफुले सो विषयमा माफी मागेको र विषय मिलिसकेको सन्दर्भमा फेरि बल्झन थालेको बताएका छन् ।
गत साता सजनसहित अर्का कमेडियन उत्सव सापकोटा, पडकास्ट सुशान्त प्रधान लगायत विरुद्ध गायक कुमा सागरलाई गिज्याएको आरोपमा काठमाडौँ प्रहरी परिसरमा उजुरी परेको थियो ।