काठमाडौंको नागढुङ्गामा माइक्रोबस दुर्घटना, युवतीको निधन, तीन जना घाइते

काठमाडौं
काठमाडौंको नागढुङ्गामा माइक्रोबस दुर्घटनामा परेर एक महिलाको निधन भएको छ भने तीन जना घाइते भएका छन् ।
आइतबार साँझ सो स्थानमा दुर्घटना हुँदा माइक्रोबस (हाईस)मा सवार हाल वतन नखुलेकी अन्दाजी २५ वर्षीया सबिना गुरूङको मृत्यु भएको छ ।
प्रहरीका अनुसार काठमाडौं चन्द्रागिरी नगरपालिका–२ नागाढुङ्गा ढलानस्थित सडकमा चितवनबाट काठमाडौंतर्फ आउँदै गरेको ग.१ ख ५५४६ नम्बरको हाईस अनियन्त्रित भएपछि दुर्घटना भएको हो ।
दुर्घटनामा गम्भीर घाइते भएकी उनको राष्ट्रिय ट्रमा सेन्टरमा उपचारको क्रममा मृत्यु भएको थियो ।
साथै दुर्घटनामा घाइते भएका हाईसमा सवार २ जनाको राष्ट्रिय ट्रमा सेन्टरमा र १ जनाको अन्नपूर्ण न्युरो अस्पताल माइतीघरमा उपचार भइरहेको छ । घाइते तीनै जनाको प्रहरीले नाम खुलाएको छैन ।
माइक्रो बस चालकलाई प्रहरीले कानूनी कारवाहीका लागि नियन्त्रणमा लिएको बताएको छ ।