‘कर्मा’का निर्देशक सौरभ चौधरी चलचित्र प्रर्दशनमा सहकार्य गर्न तयार

एउटै मितिमा आउने नै भएपछि अब सबैले मिलेर हलसम्म दर्शक आउने वातावरण कसरी बनाउने त्यसतर्फ ध्यान दिन सकियो भने फाइदा हुन्छ

ललितखबर
पछिल्लो समय एकै दिन धेरै नेपाली चलचित्र जुधाएर प्रर्दशन गर्ने चलन बढ्दै गएको छ । चाड पर्व र सार्वजनिक विदाको छेको पारेर चलचित्र प्रर्दशन गर्ने निर्माता र वितरकहरुबीच प्रतिश्पर्धा नै चल्ने गरेको छ ।
चलचित्र निर्माण गर्नुभन्दा प्रर्दशन गर्दा धेरै राजनीति हुने गरेको निर्माताहरु सार्वजनिक कार्यक्रममै दुखेसो पोख्छन् । नयाँ निर्माता र निर्देशकहरु चलचित्र प्रर्दशनको बेला तनावमा हुन्छन् ।
गएको दशैं र शिवरात्रीमा तीन चलचित्र एकै पल्ट प्रर्दशन सुरु गरियो । सो समयमा निर्माताहरुले सामाजिक सञ्जालमार्फत वाकयुद्ध नै छेडेका थिए ।
यही नयाँबर्षको छेको पारेर चैत्र २९ गतेबाट दुई चलचित्र प्रर्दशनको तयारी भइरहेको छ । चलचित्र नरसिंहा अवतार, ‘कर्मा’ र पिताम्बर प्रर्दशनको तयारी गरिए निर्देशक दिवाकर भट्टराईले चलचित्र नरसिंहा अवतारको प्राविधिक काम नसकिएको भन्दै मिती घाषणा स्थगित गरेका छन् । अब चलचित्र ‘कर्मा’ र पिताम्बरको व्यावसायिक भिडन्त निश्चित छ ।
दुबै चलचित्रका निर्माण पक्ष पछिल्लो समय प्रचारमा व्यस्त छन् ।
चलचित्र ‘कर्मा’का निर्देशक सौरभ चौधरीले चैत २९ का लागि सबैभन्दा पहिला आफूले प्रर्दशनको घोषणा गरेको बताएका छन् । आफूले प्रदर्शन मिति तोक्दा अरु कुनै पनि चलचित्र नरहेको उनको भनाइ छ । उनले चलचित्र पिताम्बरभन्दा आफू अघि नै चलचित्र प्रर्दशनको लागि मिती लिएको ठोकुवा गरेका हुन् ।
आफू छायांकनमा गएर आधाउदी सुटिङ गरेपछि मात्रै अरूले चैत २९ मा आउने भन्दै प्रर्दशनको घोषणा गरेको लिएको उनको दाबी छ ।
यद्यपी उनी चलचित्रहरुबीचको आन्तरिक प्रतिश्पर्धालाई सकारात्मक रुपमा लिन्छन् । “कसले कहिले प्रर्दशन हुने मिति लिएभन्दा पनि अब सबै मिलेर कसरी हलमा दर्शकलाई ल्याउने भन्नेतर्फ सोच्नुपर्छ होला,”
चलचित्रका निर्माता र वितरकबीच सहकार्य गरेर चलचित्र प्रर्दशन गर्ने चाहना राख्दै उनी भन्छन्, “एउटै मितिमा आउने नै भएपछि अब सबैले मिलेर हलसम्म दर्शक आउने वातावरण कसरी बनाउने त्यसतर्फ ध्यान दिन सकियो भने फाइदा हुन्छ ।”
चलचित्र ‘कर्मा’मा विपीन कार्की, उपासना सिंह ठकुरी, मुकुन भुसाल, दिब्यदेब, सरिता गिरी, बेन बस्नेत, सुज्यान सिलवाल, अनिल बुढाथोकी, निर्मल शर्मालगायतको अभिनय रहेको छ ।
चलचित्र ‘कर्मा’ आगामी चैत २९ गते नेपाल र विदेशमा यो चलचित्र एकसाथ प्रदर्शन हुनेछ ।
चलचित्र पिताम्बरमा सौगात मल्ल, प्रदीप खड्का र दयाहाङ राईसँगै दिव्या रायमाझी, अनुपविक्रम शाही, सुरक्षा पन्त, प्रमोद अग्रहरी, दिव्यदेव, सुपुष्पा भट्ट, कामेश्वर चौरासिया, गौरव विष्ट, विशाल पहारी लगायतका कलाकारको अभिनय रहेको छ।