चलचित्र ‘खेल’ ट्रेलर : काठमाडौंको पृष्ठभूमिमा रोग,खेल र रहस्य

काठमाडौं
भर्खरै निर्माणाधिन नयाँ चलचित्र ‘खेल’को ट्रेलर सामाजिक सञ्जाल युट्युवमार्फत सार्वजनिक भएको छ ।
चलचित्रमा गज्जवको प्रकाश संयोजन र फरक दृश्यभाषा रहेको बुझ्न कठीन पर्दैन । दृश्यहरुमा काठमाडौं उपत्यकाको पुरातात्विक सम्पदासँगै इतिहासका तथ्यहरु समेटिएको छ । मानिसहरुले भोग्नु परेको रोग र महामारीको वर्णन गर्दै गरेका पात्रहरुले चलचित्रमा खास भिन्न र रहस्यमय विषयबस्तुमा चलचित्र बनेको आभास दिन्छ ।

ट्रेलरलाई पात्रहरुबीच द्वन्द्व, षड्यन्त्र, डाह र रिसरागजस्ता मनोभावको प्रवेश गराएर चलचित्रको विषयबस्तुमा रोचक मोडहरु रहेको संकेत गरिएको छ ।
काठमाडौंको होस्टेलमा बसेका साथीहरूको कथा प्रस्तुत यस चलचित्रमा नेपाली लोककथा, परम्परा, अध्यात्म, थ्रिलर, र सस्पेन्सको मिश्रण छ । चलचित्रको शिर्षक ‘खेल’को ट्रेलरमा लुडो र अन्य खेलहरू खेलिरहेको दृश्य देखिन्छ ।
चलचित्रको ट्रेलरमा कलाकारहरू सुरक्षा पन्त, मोनिका थापा, हेना नगरकोटी, निकिता आचार्य, समापिका गौतम, मिथिला शर्मा, सरिता गिरी, र भोलाराज सापकोटालाई देखाइएको छ । चलचित्र ‘खेल’ लाई अनुराग प्रधान र आस्था श्रेष्ठले संयुक्त रूपमा निर्देशन गरेका छन् ।
ट्रेलरमा देखिएका प्रमुख पात्रहरु सुरक्षा पन्त र हेना नगरकोटीजस्ता कलाकारको संवाद छैन । तर उनीहरुका धेरै दृश्य ट्रेलरमा हेर्न पाइन्छ । सस्पेन्स थ्रिलर विधामा निर्माण भएको चलचित्र ‘खेल’ अभिनेत्री सुरक्षा पन्तको अस्वाभाविक व्यवहार, हेना नगरकोटीको रहस्य सुल्झाउने प्रयास, र मोनिका थापा र समापिका गौतमको फरक गतिविधिले चलचित्रमा रहस्य र डरको आभास दिन्छ ।
आगामी वैशाख १२ गते प्रदर्शनमा आउने तयारीमा रहेको यस चलचित्रको निर्माताहरू लुइसराज महर्जन र आशिषराज महर्जन हुन् भने सह–निर्माताहरू कुणालराज गुरुङ र रहिशराज महर्जन रहेका छन् । चलचित्रको कथा आशिषराज महर्जनले लेखेका हुन् भने पटकथा अभितेन्द्र र अनुराग प्रधानले तयार पारेका छन् ।