काठमाडौँ उपत्यकामा चोरी भएका सवारीसाधन फेला पारेर प्रहरीद्वारा फिर्ता

काठमाडौँ
ट्राफिक प्रहरीले काठमाडौँ उपत्यकाबाट चोरी भएका २० थान दुईपाङ्ग्रे सवारीसाधन फेला पारेर सम्बन्धित धनीलाई बुझाएको छ ।

काठमाडौँ उपत्यका ट्राफिक कार्यालय रामशाहपथको टोलीले काठमाडौँ उपत्यकाका विभिन्न स्थानबाट हराएका १३ मोटरसाइकल र सात स्कुटर फेला पारेर आज सम्बन्धित धनीलाई हस्तान्तरण गरेको हो ।

कार्यालयका प्रवक्ता, प्रहरी उपरीक्षक दीपक गिरीले ट्राफिक प्रहरी कार्यालयमा प्राप्त निवेदनका आधारमा विभिन्न स्थानबाट खोजीगरी सम्बन्धित धनीलाई हस्तान्तरण गरिएको जानकारी दिएका छन् ।

ट्राफिक प्रहरीले काठमाडौँ उपत्यकाको जगाति, चुनदेवी, बानेश्वर, गौरीघाट, मङ्गलबजार, इमाडोल, लुभु, सोह्रखुट्टे, कलङ्की, नयाँबसपार्क, बाफल, थली, नेपालटार र मुलपानीलगायत स्थानबाट उक्त सवारीसाधन फेला पारेको थियो । प्रहरीले चालू आर्थिक वर्षमा काठमाडौँ उपत्यकाका विभिन्न स्थानबाट हराएका ३८६ मोटरसाइकल तथा स्कुटर फेला पारेर सम्बन्धित धनीलाई जिम्मा लगाइसकेको छ ।

सवारीसाधन चोरीमा संलग्न ५४ जनालाई पक्राउ गरेको छ । ट्राफिक प्रहरीले आव २०७९÷०८० मा ४९९ वटा र आव ०८०÷०८१ मा ४१७ वटा मोटरसाइकल तथा स्कुटर फेला पारेर सम्बन्धित धनीलाई हस्तान्तरण गरेको थियो ।

सवारीसाधन हराएमा ट्राफिक प्रहरीको हटलाइन नम्बर १०३ वा नेपाल प्रहरीको हटलाइन नम्बर १०० मा फोन गर्न र नजिकको प्रहरी कार्यालयमा निवेदन दिन सकिने ट्राफिक प्रहरीले जनाएको छ ।