चलचित्र ‘अञ्जिला’ पाँचौँ हप्तासम्म निरन्तर प्रर्दशनमा

काठमाडौं
नेपाली चलचित्र ‘अञ्जिला’ले पाँचौँ हप्तासम्म निरन्तर प्रर्दशन हुन सफल भएको छ ।

निर्माण पक्षका अनुसार चलचित्रको व्यापार पछिल्लो समयसम्म पनि निरन्तर जारी रहेको छ ।

चलचित्रको प्रर्दशन शनिवार समेत उत्साहजनक व्यापार कायम राख्न सफल भएको निर्माण पक्षको भनाई छ । चलचित्र काठमाडौंसहित देशभरका हलहरूमा झन्डै ५० शो प्रदर्शन भइरहेका छ ।

फागुन २९ यता नेपाली र विदेशी गरी दर्जनभन्दा बढी चलचित्रहरू प्रदर्शनमा आए पनि ‘अञ्जिला’को व्यापारमा कुनै कमी नभएको निर्माण पक्षको दाबी छ ।

गत वर्षको अन्त्यतिर प्रदर्शनमा आएको भए पनि ‘अञ्जिला’को बक्स अफिस रिपोर्टमा उत्कृष्ट पाँच चलचित्रको स्थान कब्जा गरेको देखिएको छ ।

यो चलचित्र नेपाली महिला राष्ट्रिय फुटबल टिमकी कप्तान एन्जिला तुम्बापो सुब्बाको जीवनीमा आधारित छ । चलचित्रमा एन्जिला आफैँले प्रमुख भूमिकामा अभिनय गरेकी छन् ।
निर्देशक मिलन चाम्स रहेको चलचित्रमा एन्जिलासँगै प्रेमकुमार श्रेष्ठ, सुनिल थापा, दयाहाङ राई, विजय बराल, सिर्जना सुब्बा, माओत्से गुरुङ, सुमीन गुरुङ, बुद्धि तामाङ लगायतका कलाकारहरूको अभिनय रहेको छ ।

निर्देशक चाम्सले भने, “दर्शकले माया दिनु भएको छ, त्यसले निकै ऊर्जा मिलेको छ । एन्जिलाले भोगेको कथाले दर्शकलाई भावनात्मक सम्बन्ध जोड्न सघायो । अझै केही हप्ता प्रदर्शनलाई निरन्तरता दिने तयारीमा छौँ,”