अभिनेत्री समापिका गौतम थिएटर हुँदै ठूलो पर्दामा

काठमाडौं

पछिल्लो समय थिएटरमा नाटकसँगै करियर बनाउदै गरेका कलाकारहरु ठूलो पर्दामा आउने क्रम बढेको छ । थियटरमा कला प्रस्तुत गरिरहेका कलाकार समापिका गौतम चलचित्र ‘खेल’मार्फत ठूलो पर्दामा डेव्यु गरेकी छिन् ।

थिएटरमा अभिनय गर्दै हुर्किएकी समापिका ‘खेल’लाई आफ्नो अभिनय यात्राको महत्त्वपूर्ण मोड मान्छिन् । पर्दामा देखिन पाउनु उनको लागि रोमाञ्चक अनुभव मात्र नभई जीवन उपयोगी शिक्षाले भरिएको पल पनि रह्यो । उनी भन्छिन्, “म पर्दामा धेरै चलचित्र कर्मीहरूलाई देख्दै हुर्किएकी हुँ । अब पर्दामा आफूलाई देख्दा जुन अनुभूति भयो, त्यो शब्दमा भन्न गाह्रो छ ।“

थिएटर अभिनयमार्फत कलात्मक आत्मविश्वास बनाएकी समापिकाले आफ्नो अभिनय यात्रालाई सिकाइ र मार्गदर्शनको अवसरका रूपमा हेर्छिन् । थिएटर र चलचित्रबीच केही टेक्निकल भिन्नता भए तापनि, उनले दुवै माध्यमलाई समान रूपमा आत्मसात् गरेकी छन् । “मलाई सिकेको कुरा अभिव्यक्त गर्न पाए आत्मसन्तुष्टि मिल्छ,“ समापिका भन्छिन् ।

चलचित्रमा उनले ‘ईसा’ नामकी युवतीको भूमिका निर्वाह गरेकी छन्, जो साथीहरूलाई माया गर्ने, उनीहरूको इच्छा विपरीत जान नसक्ने भावुक पात्र हुन् । समापिकाले आफूलाई पनि केही हदसम्म ईसासँग मिल्ने बताउँछिन् । “हाम्रो केही स्वभाव मिल्छन्, तर केही भिन्नता पर्दामा हेर्न पाइन्छ,“ उनी भन्छिन् ।

सानैमा टेलिभिजन हेरेर कलाकार बन्ने रहर जागेको बताउने समापिकाको अभिनय यात्रा एसएलसीपछि थिएटर प्रवेशसँग सुरु भएको हो । परिवारको साथ र प्रेरणाले उनलाई यो क्षेत्रमा डो¥यायो । उनले स्कुले दिनहरूमा अभिनय गरेर दर्शक हँसाउने, रुवाउने अवसरहरूबाट नै आफूभित्रको कलाकार पहिचान गरेकी थिइन् । समापिकाको अभिनय यात्राको लक्ष्य केवल पर्दामा देखिनु मात्र होइन, नेपाली सिनेमामा कला चेत निर्माण गर्ने योगदान दिनु हो । उनलाई आफूलाई भर्सटाइल कलाकारका रूपमा स्थापित गर्दै फरक–फरक कथाहरूमा काम गर्न मन छ ।

नेपाली सस्पेन्स थ्रिलर चलचित्र ‘खेल’ आगामी वैशाख १२ गतेदेखि देशभर प्रदर्शनमा आउने तयारीमा छ । नेपाली लोककथा, परम्परा, अध्यात्म र थ्रिलरको सम्मिश्रणमा आधारित यस चलचित्रमा अध्ययनका लागि काठमाडौंको होस्टेलमा बसेका केही साथीसँग सम्बन्धित कथा प्रस्तुत गरिएको छ ।

अनुराग प्रधान र आस्था श्रेष्ठद्वारा निर्देशित ‘खेल’ सिरुपाते कट्स प्रालिको ब्यानरमा निर्माण भएको हो । लुइसराज महर्जन र आशिषराज महर्जन निर्माता रहेको यो चलचित्रमा सुरक्षा पन्त, मोनिका थापा, हेना नगरकोटी, निकिता आचार्य, मिथिला शर्मा, सरिता गिरी र भोलाराज सापकोटाको पनि अभिनय रहेको छ ।